Дунёнинг бирор-бир мамлакати 25 йил аввал қабул қилинган Хотин-қизлар ҳуқуқлари тўғрисидаги Пекин декларацияси тамойилларини тўлиқ бажаришга яқинлашмади. «Gazeta.uz»нинг ёзишича, бу ҳақда БМТ матбуот хизмати хабар берди.
Қайд этилишича, Пекин декларацияси ва Ҳаракатлар платформаси гендер тенглиги соҳасидаги энг муҳим халқаро ҳужжатлардан бири ҳисобланади. Унда танлов эркинлиги ва имкониятлар тенглиги тамойиллари мустаҳкамланган. Декларацияда, хусусан, барча аёллар зўравонликсиз яшаш, таълим олиш ва эркаклар қатори тенг иш ҳақи олиш ҳуқуқига эга эканлиги таъкидланади.
«(Пекин декларацияси ва Ҳаракатлар платформасида мустаҳкамланган) мазкур режа фақат қисман амалга оширилди. Биз ҳали ҳам эркаклар ҳукмронлик қиладиган дунёда яшаяпмиз, маданиятимиз ҳанузгача эркакларга йўналтирилган ва бу вазият ўзгариши керак», — деди БМТ бош котиби Антониу Гутерриш.
БМТда дунё ҳукумат вакиллари ва раҳбарларининг фақатгина 25 фоизини аёллар ташкил этиши эслатиб ўтилди. Парламент аъзоларининг 75 фоизи ва раҳбарларининг 73 фоизи ҳанузгача эркаклардир.
2020 йил коронавирус пандемияси туфайли аёлларнинг аҳволи ёмонлашди. БМТ маълумотларига кўра, пандемия яна 47 миллион аёлни қашшоқлик чегарасига олиб келади.
«Биламизки, аёллар оила аъзоларига ғамхўрлик қилиш бўйича кўп вазифаларни ўз зиммаларига олишади; улар камроқ иш ҳақи оладилар, одатда улар доимий иш жойларида ишламайдилар», — дея таъкидлади БМТнинг Аёллар бўлими раҳбари Фумзиле Мламбо-Нгкука.БМТ барча мамлакатларни Пекин декларацияси тамойилларини амалга ошириш бўйича саъй-ҳаракатларини кучайтиришга ҳамда аёллар ва қизларнинг аҳволини яхшилаш учун барча имкониятларни ишга солишга чақирди. 1 октябрь куни БМТ Бош ассамблеясининг яқинлашиб келаётган сессияси доирасида дунё раҳбарлари иштирокида шу мавзуга бағишланган учрашув бўлиб ўтиши режалаштирилган.
Эслатиб ўтамиз, Ўзбекистонда сўнгги йилларда хотин-қизларнинг ҳуқуқ ва манфаатларини ҳар томонлама таъминлашга қаратилган 20 га яқин норматив-ҳуқуқий ҳужжат қабул қилинди. Хусусан, «Хотин-қизлар ва эркаклар учун тенг ҳуқуқ ва имкониятлар кафолатлари тўғрисида»ги ҳамда «Хотин-қизларни тазйиқ ва зўравонликдан ҳимоя қилиш тўғрисида»ги қонунларнинг қабул қилиниши бу борадаги ҳуқуқий асосларни мустаҳкамлади.
2019 йилнинг март ойида БМТнинг Нью-Йоркдаги штаб-квартирасида БМТнинг Хотин-қизлар ҳолати бўйича комиссиянинг 63-сессиясида Ўзбекистоннинг аёллар борасидаги давлат сиёсати юқори баҳоланган.
Шавкат Мирзиёев Олий Мажлиси Сенатида янги – Хотин-қизлар ва гендер тенглик масалалари бўйича қўмита тузишни таклиф этганди.
Изоҳ (0)