Европа Иттифоқи россиялик сиёсатчи Алексей Навальнийнинг заҳарланишини жуда қаттиқ қораламоқда. Бу ҳақда ЙИ дипломатияси раҳбари Жозеп Боррелнинг баёнотида сўз боради.
Кимёвий қуролдан фойдаланиш «инсон ҳуқуқлари соҳасидаги халқаро стандартлар ва халқаро ҳуқуқларнинг жиддий бузилиши бўлиб, мутлақо қабул қилиб бўлмайдиган» ҳолат дейилади баёнотда.
«Европа Иттифоқи ҳамкорликдаги халқаро реакцияга чақиради ва тегишли чоралар, шу жумладан чеклов чораларини кўриш ҳуқуқини ўзида сақлаб қолади», — дейди иттифоқ дипломатияси раҳбари.
У Россияни заҳарланиш ҳолатини текширишга ва айбдорларни жавобгарликка тортишга, шунингдек, Кимёвий қуролларни тақиқлаш бўйича ташкилот билан ҳамкорлик қилиб, «халқаро холис терговни таъминлаш»га чақирган.
Эслатиб ўтамиз, 2 сентябрь куни Германия ҳукумати Навальний Россияда «Новичок»га ўхшаш модда билан заҳарланганини маълум қилган. Сиёсатчи даволанаётган «Шарите» клиникаси шифокорларининг сўровига биноан ўтказилган тестлар натижаларидан шундай хулосага келинган.
Германия канцлери Ангела Меркель Россия ҳукумати Навальний заҳарланиши билан боғлиқ «жиддий саволларга» жавоб бериши кераклигини айтди. Мухолиф сиёсатчига қилинган суиқасд Буюк Британия, АҚШ ва Францияни ҳам ғазаблантирди. Лондон Навальнийга нисбатан кимёвий қурол қўлланилишини «аблаҳона» иш деб атади. Вашингтон айбдорларга нисбатан молиявий чекловлар қўллашга ваъда берди. Франция Навальнийнинг заҳарланишини «ажабланарли ва масъулиятсизлик» деб атаган.
Изоҳ (0)