Пекин аэропорти қарийб ярим йиллик танаффусдан кейин 3 сентябрь куни саккизта давлатдан авиарейсларни қабул қилишни бошлади. Бу ҳақда «Интерфакс» хабар берди.
Хитой пойтахтига COVID-19 коронавирус инфекцияси билан касалланиш даражаси нисбатан пасайган саккизта давлатдан парвозларни амалга ошириш мумкин.
Европа мамлакатлари орасида Австрия, Дания, Швеция ва Грециядан парвозларни амалга оширишга рухсат берилган. Шунингдек, Таиланд, Камбоджа, Покистон ва Канададан ҳам Хитой пойтахтига парвозларни амалга оширишга рухсат этилган. Пекин шаҳар маъмурияти вакилининг таъкидлашича, барча йўловчилар мазкур давлатларнинг фуқаролари бўлиши керак.
Пекинга етиб келган йўловчилар уларда коронавирус йўқлиги ҳақида маълумотнома тақдим этиши керак, шунингдек, улар 14 кунлик марказлаштирилган мажбурий карантинни ўташи зарур.
Биринчи босқичда Пекин кунига бештадан самолёт ва энг кўпи билан 500 нафар йўловчини қабул қилади. Кейинчалик қабул қилинадиган йўловчилар сонини 1000 кишигача ошириш режалаштирилмоқда.
Хитой пойтахти 23 март куни ўз аэропортини халқаро авиапарвозлар учун ёпганди. Аввалроқ Хитой бошланаётган пандемия фонида хитойлик сайёҳлар учун чекловлар жорий қилган АҚШ ва бошқа давлатларни танқид қилган, бироқ март ойининг охирига бориб Хитойнинг ўзи чегараларини хорижликлар учун ёпган ва берилган кириш визаларини бекор қилган.
Сўнгги ойларда Хитой чекловларни бироз енгиллаштирди. Масалан, германиялик ишбилармонларга махсус рухсатномалар мавжуд бўлганда ва карантинга амал қилиш шарти билан бир нечта парвозни амалга оширишга рухсат берилган. Бироқ Пекин алоҳида ҳимоя остида бўлгани сабабли халқаро авиақатновлар шу пайтгача тақиқланганди.
Анча вақтдан буён Хитойда коронавирус билан мамлакатнинг ичида касалланиш ҳолатлари қайд этилмаяпти, барча аниқланаётган янги ҳолатлар хориждан келганларда қайд этилмоқда.
Аввалроқ Uzbekistan Airways 4 сентябрдан бешта давлат билан мунтазам халқаро авиапарвозларни тиклаши ҳақида хабар берилганди.
Изоҳ (0)