Юрак касалликлари эрта ўлимга олиб келувчи хасталиклар орасида етакчилик қилади. Шу боис юрак саломатлиги ёмонлашганидан дарак берувчи илк симптомлар ҳақида маълумотга эга бўлиш ва зарур чора-тадбирларни кўриш муҳим.
Нафас қисиши
Юрак етишмовчилигида ички органлар қон билан етарли миқдорда таъминлана олмайди бу эса уларнинг фаолиятида қийинчилик келтириб чиқаради. Биринчилардан бўлиб ўпкада ўзгариш сезилади ва одам оддий ҳаракат вақтида ҳам нафас олишга қийналади. Агар сизда нафас қисиши кузатиладиган бўлса, дарҳол шифокорга мурожаат қилинг.
Шишлар
Юрак етишмовчилиги буйрак фаолиятига ҳам ўз таъсирини кўрсатади. Буйраклар суюқлик ва тузни утилизация қилишга қийналиши оқибатида организмда кўп ҳолларда оёқ ва тўпиқда шишлар кузатилади. Аввал қулай бўлган пойабзал оёқни қисиши, пайпоқ ечилганидан кейин изи қолиши кузатилаётган бўлса, кардиолог қабулига ёзилишни унутманг.
Йўтал ва ўпканинг хириллаши
Ётган ҳолда айниқса йўталиш ҳолати кузатилаётган бўлса, унда сизда шифокорга мурожаат қилиш учун жиддий сабаб бор. Гап шундаки, юрак етишмовчилигида баъзи ҳолларда ўпкага суюқлик йиғилиб, ўлимга олиб келиши мумкин бўлган шиш билан боғлиқ бўлиш эҳтимоли йўқ эмас.
Чарчоқ
Зинадан тушиб-чиқишдан кейин бош айланиши, енгил уй юмушлари бажарилганидан кейин чарчоқ ҳис қилиш каби симптомлар кузатилса, ҳаммасини ёш ўтиши ёки зўриқиш билан боғламанг. Саломатлигида муаммо борлиги сабаб аъзоларни фаолият учун муҳим бўлган қон билан таъминлаб бера олмаган юрак, етишмовчиликни мушаклар эвазига қоплашга урингани сабаб кишида ҳолсизлик ва чарчоқ сезилади. Кундалик юмушлар сизни чарчатиб қўяётганини ҳис қилсангиз бефарқ бўлманг, мутахассис билан маслаҳатлашинг.
Ҳазм билан боғлиқ муаммолар
Иштаҳа йўқолиши, қайд қилиш, ошқозон бузилиши — ҳазм қилиш органларининг етарлича қон билан таъминлана олмаётганидан дарак бўлиши мумкин. Бу эса юрак етишмовчилигининг белгиларидан бири ҳисобланади.
Пульс тезлашиши
Пульс тезлиги, юрак қон-томир саломатлиги учун мунтазам назорат қилиниши керак бўлган энг асосий уч параметрдан бири ҳисобланади. Пульснинг доимий равишда тез бўлиши юракнинг зўриқиши ва унинг ёрдамга муҳтожлигидан далолат беради.
Изоҳ (0)