Ўзбекистоннинг Латвиядаги элчиси Қадамбай Султонов 27 август куни мамлакатнинг Финляндиядаги янги элчиси сифатида аккредитациядан ўтди, деб хабар берди «Дунё». Элчихона қароргоҳи Рига шаҳрида бўлади.
Европадаги эпидемиологик вазият туфайли Финляндия президенти Саули Ниинистёга ишонч ёрлиқларини топшириш ва Ўзбекистон элчиси ваколатларини тан олганлиги ҳақидаги мактубни имзолаш маросими масофадан туриб ўтказилган.
Хабарда қайд этилишича, Ўзбекистон ва Финляндия ўртасидаги ҳамкорлик жадал ривожланаётган бўлиб, таълим, энергетика, муҳандислик, кончилик, қишлоқ хўжалиги, АКТ, яшил технологиялар, ташқи меҳнат миграцияси ва бошқа соҳаларни қамраб олади.
Июнь ойида 18 йил ичида биринчи марта икки мамлакат ҳукуматлараро комиссиясининг йиғилиши бўлиб ўтди, унда ҳамраис сифатида Ўзбекистон томондан бош вазир ўринбосари, Финляндия томони эса ривожланиш ва ташқи савдо вазири иштирок этди. Май ойида Финляндия Оролбўйи минтақаси учун Инсон хавфсизлиги бўйича кўпшериклик траст фонди (ИХКТФ)нинг донорига айланди.
Қадамбой Султонов 2019 йилнинг октябрь ойидан буён Ўзбекистоннинг Латвиядаги элчиси.
Аввалроқ Ўзбекистоннинг Озарбайжондаги янги элчиси Баҳром Ашрафхонов Илҳом Алиевга ишонч ёрлиғини топширгани, Ўзбекистон ташқи ишлар вазири мамлакатдаги фаолияти якунланаётган Исроил элчисини қабул қилгани хабар берилган эди.
Изоҳ (0)