Футбол бўйича Европа Лигаси мусобақасининг 1-саралаш босқичида Солигорскнинг «Шахтёр» жамоаси 27 август, пайшанба куни «Сфинтул Георге»га қарши баҳс олиб борди.
Учрашув беларус клубининг устунлигида бошланди, бўлим аввалида тўп назорати тўлиқ «Шахтёр» томонида бўлди. Бироқ 29-дақиқада мезбонлар ҳужумчиси Дарко Бодул молдаванлар футболчисига нисбатан ўта қўпол ўйнади ва тўғридан-тўғри қизил карточкага лойиқ кўрилди. Шундан кейин «Сфинтул» жамоаси фаолликни оширди.
Иккинчи бўлим бошида майдонга ўзбекистонлик ҳужумчи Жасур Яхшибоев туширилди. Бу Жасур учун Еврокубоклардаги дебют ўйин бўлди. Танаффусдан кейин ҳам тўп асосан майдон марказида бўлди ва дарвозалар олида айтарли хавфли вазиятлар содир этилмади.
Қўшимча бўлимлар меҳмонларнинг кичик устунлигида ўтди. Унда ҳам ҳисоб ўзгармагач пенальтилар сериясига мурожаат қилинди. «Шахтёр» сафида биринчи бўлиб 11 метрлик нуқтага Яхшибоев яқинлашди, аммо унинг зарбаси дарвоза тўсинига тегиб қайтди. Мезбонлар сафида фақат Александр Сачивко пенальтини аниқ амалга оширди, меҳмонлардан эса тўрт футболчи мўлжалда адашмади.
Шунингдек, яна бир ўзбекистонлик футболчи Шохруҳ Гадоев тўп сурадиган «Кешля» жамоаси «Лячи» билан куч синашди. Гадоев қатнашмаган бу ўйин ҳам пенальтилар сериясига қадар етиб борди ва унда албанларнинг қўли баланд келди.
Шу тариқа «Шахтёр» ва «Кешля» илк саралаш босқичидаёқ мусобақа билан хайрлашди.
Европа Лигаси
1-саралаш босқичи
27 август, пайшанба
«Шахтёр Солигорск» Беларусь — «Сфинтул Георге» Молдова 0:0
Пенальтилар серияси — 1:4«Шахтёр Солигорск»: Гутор, Бурко, Хадаркевич, Бегунов (Сотников, 105), Сачивко, Иванович (Баланович, 46), Селява, Кендиш (Сзоке, 68), Подстрелов, Архипов (Яхшибоев, 46), Бодул.
«Сфинтул Георге»: Чеботар, Фокша, Новиков, Свинаренко, Ожог, Саня (Племедяле, 84), Сливка, Мочуляк (Юрку, 79), Смирнов, Мандриченко (Суворов, 90), Волков.
Огоҳлантиришлар: Сливка (55), Мочуляк (72), Сзоке (88), Мандриченко (90), Сачивко (112), Райлян (120).
Четлатишлар: Бодул (28), Райлян (120+1).
«Кешля» Озарбайжон — «Лячи» Албания 0:0
Пенальтилар серияси — 4:5Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)