Бокс бўйича оғир вазн тоифасида WBA собиқ чемпиони Руслан Чагаев бундан роппа-роса 9 йили аввал россиялик боксчи Александр Поветкинга қарши рингга кўтарилганди.
2011 йилнинг 27 августидаги жанг WBA’нинг вакант камари учун кечганди. Жанг аввалида россиялик боксчи кучли прессинг амалга оширади ва кўплаб зарбалар йўллайди.
6-раундга қадар Поветкин устунликка эга бўлади ва очколар ҳисобида яққол олдинга чиқиб олади. Шундан кейин Чагаев вазиятни ўз назоратига олади. Ўзбекистонлик боксчининг зарбалари борган сари аниқ ва таъсирга эга бўлиб боради. Бироқ Чагаев тез чарчаб қолади ва 11-раунд аввалида устунлик яна Александр томонига ўтади.
Сўнгги раундда Руслан бироз ўзига келади ва аниқ зарбаларда рақибидан кўра фаолроқ бўлади. Якунда ҳакамлар бир овоздан Поветкинни ғолиб деб эълон қилади: 116—112, 117—113, 117—113.
Шундан кейин Чагаев кетма-кет еттита жангда ғалаба қайд этади ва уларнинг бирида WBA камарига эга чиқади. 2016 йилнинг мартида енгилмас Лукас Браунга камарни бой берган Руслан боксдаги фаолиятига якун ясайди.
Чагаев профессионал боксда жами 38 та жанг ўтказиб, уларнинг 34 тасида ғалаба қозонади (21 та нокаут), уч марта мағлубиятга учрайди ва бир бор дурангга имзо чекади.
Изоҳ (0)