Тошкент туманида пандемия шароитида дори воситаларини қиммат нархларда сотиб даромад орттириб қолиш мақсадида 99 миллион сўмлик дорилар устига 30 миллион сўм қўйиб сотган шахслар ушланди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, «Л-PH.» МЧЖ раҳбари С.Х. ва фуқаро Х.Ш. олдиндан тил бириктириб, «С-PH.» МЧЖдан 99,6 миллион сўмлик «Плекнил» ва «Рибоверин» дориларини пул кўчириш йўли билан харид қилган. Шу куннинг ўзида ушбу дори воситаларини харидорга 131 миллион сўмга сотаётган вақтида департаментнинг Тошкент тумани бўлими томонидан ўтказилган тезкор тадбирда ашёвий далил билан ушланган.
Мазкур ҳолат юзасидан С.Х. ва Х.Ш.га нисбатан Жиноят кодексининг 186-3-моддаси 3-қисми «а» банди билан жиноят иши қўзғатилиб,тергов ҳаракатлари ўтказилмоқда.
Эслатиб ўтамиз, Ўзбекистонда дорилар танқислиги ва нархи оширилгани юзасидан 3000 дан ортиқ дорихоналарга огоҳлантириш берилган.
Аввалроқ Оққўрғонда талаб юқори бўлган дори нархини сунъий ошириб, 30 қутисини 8,1 миллион сўмга сотган шахслар қўлга олингани, Самарқандда 34 миллион сўмлик дори воситаларининг ноқонуний савдосига чек қўйилгани ҳақида хабар берилган эди.
Изоҳ (0)