Беларусда нима гап? 25 августнинг асосий воқеалари

Мана уч ҳафтадирки Беларусда норозилик намойишлари бўлиб ўтмоқда. Бугун намойишларнинг 17-куни. Бугунги асосий воқеалар билан таништириб ўтамиз.

Вазирлик биноси олдига куч ишлатар тизим ходимлари ва ҳарбий техника жойлаштирилди.

Намойишлар бошланганидан буён Беларусь фанлар академиясининг олимлари намойишчиларга хайрихоҳликларини билдириб келаётган эди. Бугун академия маъмуриятига намойишларни қўллаб-қувватлаган ходимларни ишдан бўшатиш ҳақида кўрсатма келди.

Бунга жавобан одамлар академия ходимларини қўллаб-қувватлаб бирдамлик занжирларини ташкил қилди. Намойишчилар академия президиуми биноси олдида митинг ташкил қилди. Полиция уларни тарқалишга чақирди.

Шунингдек, бугун мухолифатнинг Мувофиқлаштирувчи кенгашининг икки аъзоси – МТЗ иш ташлаш қўмитаси раиси Сергей Дилевский ҳамда Ольга Ковальковалар 10 кунлик қамоқ жазосига ҳукм қилинди. Улар кеча ҳибсга олинган эди. Уларга оммавий тартибсизликлар келтириб чиқариш айби қўйилган эди.

Кеча Мувофиқлаштирувчи кенгаш иши юзасидан унинг яна икки аъзоси Павел Латушко ва Нобель мукофоти лауреати Светлана Алексиевич ҳам сўроққа чақирилди.

Бугун эса Павел Латушко гувоҳ сифатида сўроққа тутилди ва жараён 3,5 соат давом этди.

Унинг жараён ҳақидаги фикрларини ушбу видео орқали томоша қилишингиз мумкин.

Беларуснинг мухолифатдаги президенти деб кўрилаётган Светлана Тихановская Европарламентда масофадан туриб нутқ сўзлади.

«Беларусда тинч инқилоб бўлиб ўтмоқда. У табиати жиҳатидан геосиёсий характерга эга эмас. Инқилоб на россияпараст, на унга қарши қаратилган. Шунингдек, у европапараст ҳам, унга қарши ҳам эмас. Бу демократик инқилоб. Бу халқнинг ўз етакчиларини эркин танлаш ва ўз тақдирини белгилаш учун олиб бораётган кураши», дея унинг сўзларидан иқтибос келтирди Meduza нашри.

Унинг мурожаати «РБК» телеканали томонидан трансляция қилинди.

Бугун у беларусларга ўзининг навбатдаги видеомурожаатини йўллади. Бу галги мурожаат Беларусь республикасининг мустақиллик куни муносабати билан амалга оширилди. Ўз мурожаатида Тихановская халқни маҳаллий вақт билан соат 18:00 да Мустақиллик майдонига келишларини сўради. Беларусь 1991 йил 25 декабрь куни мустақиллигини эълон қилган эди.

Кутилганидек, соат 18:00 да одамлар Мустақиллик майдонига келишни бошлади.

Ёмғир ёғиб турган бўлишига қарамай, одамлар Мустақиллик майдонида тўпланиб турибди.

Минскдаги Мустақиллик майдонида Мустақиллик куни муносабати йиғилган намойишчиларга халақит бериш мақсадида шаҳар маъмурияти овоз кучайтиргичлардан ғалати мусиқаларни қўйишди, одамлар эса бунга парво қилмай хурсандчиликларини давом эттирди.

Йиғилганлар президент Лукашенконинг ҳукуматдан кетишини талаб қилди.

Пока на площади Независимости собралось около 150 человек

Видео: «Медиазона» pic.twitter.com/LSjM2WVlFy

— Медиазона. Беларусь (@mediazona_by) August 25, 2020

Минглаб одамлар қатнашган митинг «Озодлик» радиосининг YouTube канали орқали тўғридан-тўғри трансляция қилинди.

Мустақиллик майдонида Лукашенко мухолифати митинг қилаётган пайтда, Комаровск бозори олдида унинг тарафдорлари ҳам митинг ташкил қилишди ва «фашизм ғалаба қилолмайди» дея бақирди.

Беларусь мустақиллиги кунига бағишланган митинг давом этмоқда.