Анжир мавсумига оз қолди ва шу сабаб ҳам ушбу мазали ва фойдали меванинг хусусияти ҳамда таркиби билан танишиш фойдадан холи эмас. Юрак-қон томир тизими ва тери саломатлиги учун муҳим бўлган мевани нима учун рационга киритиш ва қандай ҳолатларда истеъмолдан тийилиш кераклиги билан қуйида бўлишамиз.
Фойдаси нимада?
Анжир қуритилганда концентрацияси сезиларли даражада ошадиган турли витамин ва микроэлементларга бой ҳисобланади. Шу билан бирга, қуритилганда шакар ва калория миқдори 5 карра ортади ва шу сабаб ҳам мутахассислар ушбу мевани сархил ҳолида ейишни тавсия қилади.
Шунингдек, анжир организмдаги жараёнлар — метаболизм, қизил қон таначаларининг пайдо бўлиши, нейромедиаторлар ва бириктирувчи тўқималарнинг ишлаб чиқарилиши учун муҳим бўлган миснинг ҳам конидир.
Бундан ташқари, анжир кўп миқдорда B6 витаминини ҳам ўз ичига олади. Ушбу витамин организмнинг аминокислота ва оқсилларни парчалаб, улардан энергия олишга ёрдам беради, асаб тизими фаолиятида муҳим роль ўйнайди ва қаришнинг олдини олади.
Ёшликни сақланишида аҳамиятли бўлган, ҳужайраларни шикастланишдан ҳимоя қилувчи ва ажин тушиши ҳамда гиперпигментациянинг олдини олувчи антиоксидантларнинг ҳам манбайидир.
Анжирни мунтазам равишда истеъмол қилиш юрак-қон томир тизими учун фойдали. Ўтказилган тадқиқотларда ушбу мева истеъмолидан кейин организмдаги ёмон холестерин миқдори камайиши аниқланган.
У қон томирлар деворларини мустаҳкамлаш ва тромбларни олдини олиш хусусиятига эга бўлган K витаминига ҳам бой. Ушбу ширин мева таркибида клетчаткалар мўл бўлгани сабаб ҳам у ошқозон ҳазм тизими учун аҳамиятлидир. Анжир ичаклар перестальтикасини яхшилайди ва ҳазм тизими билан боғлиқ баъзи касалликлар олдини олади.
Зарарли бўлиши мумкин
Анжирнинг зарарли экани аниқланмагани билан баъзи сабабларга кўра уни истеъмол қилишда эҳтиёткор бўлиш керак. Унда етарли миқдорда шакар бўлгани учун ҳам унинг истеъмолидан кейин қонда қанд миқдори кўпайиши ҳатто қандли диабет касаллигига сабабчи бўлиши ҳам мумкин. Аммо анжир баргидан тайёрланган чой меванинг ўзидан фарқли ўлароқ, қондаги қанд миқдорини назорат қилади.
Таркибида шакар ва кислота мавжудлиги сабаб анжир ҳам бошқа маҳсулотлар сингари аллергик реакция келтириб чиқариши мумкин. Шу боисдан ҳам аввал анжир еб кўрмаган кишиларга бирданига кўп миқдорда истеъмол қилмаслик ва организмда жавоб реакцияси бор ёки йўқлигига эътибор қаратиш керак.
Изоҳ (0)