Беларусда нима гап? 23 августнинг асосий воқеалари

Беларусда 9 августдан буён давом этаётган норозилик намойишлари доирасида бугун, 23 август куни мамлакат пойтахти ва вилоятларида Янги Беларусь марши бўлиб ўтмоқда.

Одамлар Мустақиллик майдонида тўпланди. Расмийлар намойишчиларга халақит бериш мақсадида совет даврига оид мусиқаларни овоз кучайтиргичлар орқали узатиб турди.

“Tut.by” ва Euroradio нашрлари берган хабарларга кўра, Минскда 100 мингдан ортиқ одам намойишга чиқди.

Беларусь мудофаа вазирлиги намойишлар пайтида ҳарбий ёдгорликларга зарар етадиган бўлса, ҳарбийлар бунга қараб турмаслигини огоҳлантирди.

Гроднода 10 мингдан ортиқ киши тўпланди.

Мустақиллик майдонидан кейин намойишчиларнинг бир гуруҳи, давлат байроғи турган монумент ва Лукашенко қароргоҳи томон ҳаракатланди. Аммо уларни йўлда ҳарбийлар тўсиб қолди.

Намойишчилар, шунингдек, «Планета» меҳмонхонаси олдида ҳам тўпланди. Тахминларга кўра, 50-70 минг одам шу томонда тўпланди.

Беларусда намойишлар давом этмоқда. Намойишчилар стратегик объектларни ўраб турган ҳарбийларга яқинлашмаслик ҳақида огоҳлантирилмоқда ва Мустақллик майдонига қайтишлари сўралмоқда. Бу ҳақда Nexta Live Telegram-канали хабар қолдирди.

Беларусда намойишлар давом этар экан, бугун мамлакат ташқарисидаги сиёсий доираларда ҳам қизғин муҳокмалар давом этмоқда. Жумладан, Россия ташқи ишлар вазири Сергей Лавров бугун Беларусь мухолифатини «Венесуэла сценарийси» бўйича ҳаракат қилаётганликда айблаб чиқди.

«Улар фақатгина Беларусь президентининг истеъфосини муҳокама қилиш шарти билангина мулоқотга рози бўлмоқда. Шунингдек, ўзларининг дастурларини ҳам илгари суриш таклифини ҳам бермоқда. Бу худди Венесуэладаги воқеалар билан бир хил», дея фикр билдирди Лавров «Маънолар ҳудуди» ёшлар форумидаги маърузаси давомида.

Шунингдек, бугун Европа Иттифоқи ташқи ишлар бўйича вакили Жозеф Боррел Иттифоқ Лукашенкони легитим раҳбар сифатида тан олмаса ҳам у билан ишлашда давом этишга мажбурлигини таъкидлади.

«Биз уни худди Мадурони легитим деб тан олмаганимиздек легитим деб тан олмаймиз. Бу жиҳатдан қараганда уларнинг иккаласи ҳам бир хил вазиятда турибди. Улар ҳокимиятни қонуний  қўлга киритган деб ҳисобламаймиз. Лекин бу бизга ёқадими йўқми, улар вазиятни назорат қилмоқда ва биз ишлашда давом этишга мажбурмиз», деди вакил.

Шунингдек, Лукашенко ўз саройига вертолётда учиб келгани акс этган видео шов-шувга сабаб бўлди. Лукашенко бронежилетда, қуролли юриши вазият жиддийлигини кўрсатмоқда.