Шоу-бизнес вакиллар муваффақиятли карьерани истайди. Айрим юлдузлар эса фильмдаги ижроси омад олиб келган бўлса ҳам ўша ролини ёқтирмайди. Бунинг сабаби нимада? Қуйида ушбу саволга жавоб берамиз.
Холли Берри — «Мушук аёл»
Режиссёр Питоф мушук аёл ҳақида фильм суратга олмоқчи бўлганда ҳеч ким ушбу ролни Холличалик қойиллатмайди деб ўйлаган. Ушбу лойиҳада иштироки актрисани эрининг хиёнатидан юзага келган депрессиядан қутулишига ёрдам берган. Аммо бу вақтда Холли «Мушук аёл» карьерасидаги энг ёмон ижро бўлишини билмаган. Кинолента «Олтин малина» тақдирлаш маросимига номзод бўлган, актриса бўлса «Энг ёмон аёл ижро» номинация бўйича мукофот қўлга киритган. У тақдирлаш маросимига «Оскар» статуэткаси билан бирга ташриф буюрган ва мазкур лойиҳа карьерасини барбод қилишини кутмаганини таъкидлаган.
Роберт Паттинсон — «Сумерки»
«Сумерки» фильмидаги ижросидан кейин машҳурликка эришган актёр айнан шу фильмдаги ижросини энг кўп ёмон кўриши кимни хаёлига келибди дейсиз? Маълумотларга кўра Роберт сценарий ва унинг муаллифи Стефани Майер ҳамда ўз қаҳрамони Эдвард Каллендан кўнгли тўлмаган. Актёрнинг айтишига қараганда, сценарийда Эдвард образи ҳар томонлама мукаммал қилиб тасвирланган ва Роберт бундай мукаммал бўла олмаган. Шу сабаб ҳам у сценарийни ўқиш давомида қаҳрамонини кўпроқ ёмон кўрган. Актёр қандай фикрда бўлмасин бир нарса аниқ, айнан ушбу фильмдаги роли унга машҳурликка олиб келган. Бундан ташқари у биринчи севгисини ҳам айнан ушбу фильмнинг суратга олиш майдончасида учратган.
Меган Фокс — «Трансформер»
Режиссёр Майкл Бейнинг таклифига биноан Меган Фокс «Трансформер»да роль ижро қилиши маълум бўлганда кўпчилик уни бундай муҳим ишни эплай олишига ишонмаган. Лекин Меган ролини маҳорат билан ижро қилишга муваффақ бўлган ва лойиҳанинг юзига айланган. Аммо учинчи қисмни суратга олиниши арафасида Меган фильм ҳақида салбий фикр билдириб, режиссёрни Гитлер билан қиёслаган. Шундан кейин продюссер Стивен Спилберг уни лойиҳадан чиқарилишини талаб қилган.
Кейт Уинслет — «Титаник»
Жаҳон киносаноатининг энг муваффақиятли фильмларидан бири «Титаник»даги ижросидан Кейт Уинслетнинг кўнгли тўлмаслигига ишониш қийин. Актриса мухлисларидан қаҳрамони Роуз ҳақида эслатмасликларини сўрайди ва фильмдаги роли суратига дастхат қўйишдан бош тортади. Бундан ташқари у фильмдаги ўхшамаган американча аксенти билан сўзлашгани сабаб «Титаник»ни томоша қилишни ҳам истамайди. My heart will go on саундтреки янграши билан эса титраб кетади.
Шон Коннери — «Жеймс Бонд»
Ушбу фильмдаги ижро сабаб Шон жаҳонда машҳурликка эришган ва мухлислари ёдида агент 007 бўлиб қолган. Лекин актёрнинг ўзига ушбу роль ёқмаган. «Мен ланъати Жеймс Бондни доим ёмон кўрганман. Уни ўлдиришни истаган бўлардим», — деган Шон.
Жессика Альба — «Фантастик тўртлик»
Ушбу фильмдаги ижроси сабаб нафақат лойиҳадаги иштирокидан ҳафсаласи пир бўлган, балки танлаган касбидан ҳам шубҳаланган. Унинг айтишига қараганда фильм режиссёри Жессика қандай бажариш мумкинлигини билмаган кўрсатмаларни берган. Масалан, Жессиканинг табиий йиғлаши ёқмаган ва ундан чиройлироқ кўз ёш тўкишини сўраган.
Дэниэл Рэдклифф — «Гарри Поттер ва тилсим шаҳзодаси»
Гарри Поттерни Дэниэлсиз тасаввур қилиб бўлмайди. Актёрнинг ўзи эса олтинчи қисмдаги ижросидан уялади ва унда ўзини жуда ҳам ёмон ижро қилган деб ҳисоблайди. Энг яхши ижросини эса фильмнинг бешинчи қисми деб билади.
Изоҳ (0)