Профессионал бокснинг супер ярим ўрта (-69,85 кг) вазн тоифасида ҳаракат қилаётган ўзбекистонлик Исроил Мадримов (6-0, 5 КО) 16 август куни Эрик Уокерга (20-3, 9 КО) қарши рингга кўтарилиб, рақибини очколар эвазига мағлуб этди.
«Дарё» мухбири эса Исроил Мадримов билан боғланиб, унинг жангдан кейинги таассуротлари, ҳакамнинг адолатсиз қарори ва келгуси режалари билан қизиқди.
Жанг ҳақида
Яратганга беҳисоб шукрлар бўлсин. Мана Америка Қўшма Штатларида 6-жангимни ўтказиб, ғалаба қозондим. Шу ўринда барча юртдошларимга, ота-онамга ва мураббийларимга ўз миннатдорчилигимни билдириб қоламан. Уларнинг дуолари ва қўллаб-қувватлашлари сабаб шу даражага етиб келяпмиз.
Бевосита жангга тўхталадиган бўлсак, 12 раундлик жанг фаолиятимдаги биринчиси бўлди. Жангга атиги уч ҳафта тайёргарлик кўрдим, бу жуда қисқа муддат ҳисобланади. Лекин таваккал қилишга қарор қилдик, рақиб ҳам жуда кучли ва ноқулай эди. Таваккал қилганимиз сабаби, ҳозирда бутун дунёда ҳукм сураётган пандемия кўплаб нарсаларни тўхтатиб қўйди. Бизга эса имконият берилди ва бундан фойдаланишга қарор қилдик. Қисқа муддат тайёргарлик кўрганимиз учун жанг осон кечмади, 5 ва 6-раундда бироз чарчаб қолдим. Шукрки, кейин ўзимга келиб, ғалабани қўлга киритдим.
Ҳакамнинг нокаутни ҳисобга олмагани ҳақида
8-раундда рақибимда нокаут ҳолати кузатилганди. Ҳакам эса буни елка билан урилган зарба деб ҳисоблади. Лекин бу ерда аниқ зарба берган эдим. Албатта, бу ҳали ассосиация томонидан кўриб чиқилади. Яна шуни айтишим мумкинки, 12 раундлик жанг мен учун жуда катта тажриба мактаби бўлди. Кейинги жангларимда бу катта ёрдам бериши аниқ.
Исроил Мадримов рақибини нокаутга учратди, аммо ҳакам буни ҳисобламади (видео)
Жанг тоифаси ўзгаргани ҳақида
Аслида вақтинчалик чемпионлик камари учун жанг қилишим керак эди, лекин промоутерларим шуни лойиқ кўрди. Аксинча, бир тарафдан яхши бўлди. Эндиликда бу жангдан кейин чемпионликка асосий даъвогар бўлсам ҳам бўлади.
Ушбу жангдаги ғалабаси учун қанча гонорар олгани ҳақида
Бу жангдан 50 минг АҚШ доллари миқдоридаги гонорар олдим.
Келгуси режалари ҳақида
АҚШда қолиб, кейинги жангга тайёргарлик кўришни режалаштирганмиз.
Билол ЭРКИН суҳбатлашди
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)