Лукашенко Витебскдаги десантчиларни Беларусь ғарбий чегарасига жойлаштириш бўйича буйруқ берди

Беларусь президенти Александр Лукашенко ҳаво-десант бригадасини Витебскдан мамлакат ғарбий чегарасидаги Гродно шаҳрига жойлаштириш тўғрисида буйруқ берди, деб ёзади «Интерфакс».

«Ушбу ҳудудларда содир бўлаётган воқеаларни тинчгина кузатиб ўтира олмаймиз. Мазкур муаммо, шунингдек, ҳарбийларимизни ҳам ташвишга солмоқда. Шу сабабли ғарбий чегарадаги вазият кескинлашгани сабаб қўшимча равишда Витебскдаги ҳаво-десант бригадасини Гроднога жойлаштиришни сўрайман», — дейди Лукашенко.

Беларусь президенти десантчиларнинг Витебскдан Гроднога жойлаштирилиши нима сабабдат амалга оширилаётганига ойдинлик киритмаган.

Аввалроқ Беларусда махсус хизматнинг собиқ ходимлари намойишларнинг бостирилишига норозилик сифатида формаларини ташлаб юбораётгани тўғрисида хабар берилганди.

Эслатиб ўтамиз, Беларусда 9 август куни президент сайлови бўлиб ўтди. Сайлов куни Минск марказида ҳарбий техника пайдо бўлди. Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.