Беларусда 9 августдан буён давом этаётган норозилик намойишларининг 7-куни дайжести билан танишинг.
Хотира акцияси
Бугун Беларусь пойтахти Минск шаҳрида Пушкинский метростанцияси олдида 10 август куни намойишлар пайтида вафот этган Александр Тараиковский хотирасига бағишланган намойиш бўлиб ўтди. Минглаб беларуслар норозилик намойишида иштирок этиш учун тўпланди. Намойишчилар Минск кўчаларида президент истеъфосини талаб қилиб қилмоқда.
Шунингдек, бугун Лукашенко Мудофаа вазирлигининг стратегик бошқарув маркази йиғилишида мажлис ўтказди. Унда чиқиш қилган Лукашенко намойишлар ва иш ташлашлар ҳеч қандай натижа бермаслигини айтиб ўтди. Ундан ташқари, «ватанни ҳеч кимга бериб қўймаслиги»ни ҳам таъкидлаб ўтди.
Мажлис давомида Лукашенко Россия президенти Владимир Путин билан суҳбатлашмоқчи эканини айтди. Шунингдек, бу фақатгина Беларусь учун эмас, барча собиқ Иттифоқ давлатлари учун хавф эканини ҳам таъкидлади. Маълум қилинишича, 15 август куни Лукашенко Минскдаги йиғилишда шундай деган: «Ҳозир Россия президенти Путин билан боғланишим керак, мен ҳозир у билан гаплаша оламан. Чунки бу (мамлакатдаги жараён) нафақат Беларусь учун хавф туғдиради… Агар Беларусда муваффақиятсизлик билан тугаса, бу намойишлар у ерда (Россияда) ҳам жонланади».
Лукашенконинг сўзларига кўра, Беларусь тажовуз ва ташқи аралашувга дуч келмоқда, мамлакатда «рангли инқилоб технологиялари» қўлланилмоқда.
Кейинроқ икки давлат раҳбари ўртасида телефон мулоқоти бўлиб ўтгани хабар қилинди. Унда президентлар Беларусдаги воқеалар ҳақида суҳбатлашди. Суҳбат ҳақида Кремль ҳам изоҳ берди. Унда Путин Беларусдаги воқеаларга тез орада ечим топилишига умид қилишини таъкидланди: «Асосийси, бу муаммолар икки мамлакат ўртасидаги ўзаро манфаатли ҳамкорликка путур етказишга интилаётган вайронкор кучлар томонидан фойдаланилмаслиги керак», дейилади хабарда.
* * *
Москва, Берлин каби шаҳарларда ҳам одамлар Беларусдаги намойишчиларга нисбатан амалга оширилаётган зўравонликларга қарши турли акциялар ўтказмоқда.
Бугун, шунингдек, ОАВда Лукашенконинг Россиянинг Беларусь суверенитетига аралашуви ҳақидаги бир йил олдинги фикрлари ва бугунги баёноти ҳақида таққослаш ўтказди. 2019 йил 24 декабрь куни Лукашенко «агар Россия Беларусь суверенитетини бузишга интилса, бу урушга олиб келиши» ҳақида гапирган эди. 2020 йилнинг 25 июнь кунги нутқида ҳам Беларусь ички ишларига ташқаридан аралашув бўлаётгани, қўғирчоқлар Польшада ҳам, Россияда ҳам яшашини айтиб ўтганди. 9 июлда эса «суверенитет ва мустақиллик сотилмайди» деганди.
Бугунги қилган чиқишида эса «ҳозир Россия президенти Путин билан боғланишим керак, мен ҳозир у билан гаплаша оламан. Чунки бу (мамлакатдаги жараён) нафақат Беларусь учун хавф туғдиради… Агар Беларусда муваффақиятсизлик билан тугаса, бу намойишлар у ерда (Россияда) ҳам жонланади» деди.
* * *
Генштаб мажлисида Лукашенко ҳарбийлар ва уларнинг оилаларига нисбатан таҳдидлар борлигини айтди ва кимларгадир қарата бундай қилмасликни ва «олов билан ўйнашмаслик»ни маслаҳат берди.
Шунингдек, у ҳарбийларда оиласи ва ўзини ҳимоя қилиш ва давлат хавфсизлигини таъминлаш учун етарли ресурслар борлигини таъкидлади.
Изоҳ (0)