Месси Левандовскига қарши. Барчаси «Барселона» — «Бавария» ўйини ҳақида

«Барселона» 14 август, жума оқшомида Чемпионлар Лигаси 1/4 финал босқичи доирасида «Бавария» билан ўзаро куч синашади. Учрашув Лиссабондаги «Эстадио да Луш» стадионида бўлиб ўтади.

Чорак финалнинг марказий ўйинида футбол мухлислари Испаниянинг амалдаги вице-чемпиони ва Германия чемпиони тўқнашувига гувоҳ бўлади. Агар аввалги мавсумларда иккала томон ҳам даҳшатлилар қаторига киритилган бўлса, бу йил улар ичида бу таърифга лойиғи деб «Бавария»ни кўрсатиш мумкин. Қизиғи, мавсум давомида иккала жамоада ҳам мураббий ўзгарди. Аммо натижалар турлича: Ҳанс Флик Мюнхени (яна) енгилмас машинага айлантирди ва қўлга киритиш мумкин бўлган барча совринларни ютди. Жамоа ҳозирда жанговар ҳолатда ва ғалабага чанқоқ бўлиб турибди. Кике Сетьен эса ҳамон қаерга келиб қолганини охиригача тушунгани йўқ. Чемпионлик «Реал»га бой берилди, ички зиддиятлар юзага кела бошлади, Месси аразлади ва ҳоказо. Тўғри, «Наполи» тўсиғидан ўтилгач жамоанинг ўзига бўлган ишончи бироз бўлса-да қайтди, лекин бу «Бавария»дек «ваҳший» жамоани мағлуб этиш учун етарли бўлармикан? Шундай экан каталонияликларнинг бор умиди Мессидан.

«Барселона»

1/8 финал босқичида жамоа «Наполи»ни мағлуб этди (1:1, 3:1). Шу тариқа «Барселона» кетма-кет 13 марта Чемпионлар Лигаси чорак финалига йўлланмани қўлга киритди (бошқа ҳеч бир жамоа кетма-кет 8 мартадан кўпроқ бундай натижага эришмаган). XXI асрда «Барселона» Германия вакиллари билан (Чемпионлар Лигасида) 28 та ўйин ўтказиб, атиги 4 марта ютқазган (19 ғалаба, 5 дуранг). Шу билан бирга, 4 та мағлубиятдан 3 таси айнан «Бавария»дан қабул қилинган.

Чемпионлар Лигасида каталонияликларнинг мағлубиятсиз серияси саккизта ўйинга етди — беш ғалаба ва уч дуранг. Ушбу учрашувларнинг ҳеч бирида «Барса» биттадан кўп гол ўтказиб юбормаган.

«Бавария»

«Бавария» ўтган босқичда «Челси»ни 4:1 ҳисобида мағлубиятга учратди. Бу жамоанинг кетма-кет 18-ғалабаси бўлди. Қайд этиш жоиз, «Бавария» қаторасига 27 учрашувдан бери ютқазмаяпти (1 та дуранг). 27 та ўйиннинг 18 тасида «Бавария» рақиблар дарвозасига иккитадан кўп тўп киритган. Чемпионлар Лигасидаги саккиз ўйинда умумий ҳисоб 31:6 тенг. Мюнхенликлар ушбу саккиз учрашувнинг бирортасида иккитадан кам гол урмаган.

Иккала жамоа ўртасидаги жами тўқнашувлар статистикаси

Жамоалар шу пайтгача 11 марта ўзаро тўқнаш келган. Икки бор «Барселона»нинг қўли баланд келган бўлса, 7 марта «Бавария» ғалаба қозонган. Яна иккита ўйинда эса томонлар муроса йўлини танлаган.

Жамоаларнинг олдинги учта ўйинида ғалаба қозонган жамоа якунда мусобақа ғолиблигини қўлга киритган.

11 ўйиндаги ўртача самарадорлик кўрсаткичи 3,2 га тенг. «Барселона» ҳар бир ўйинда ўртача 1,4 та, «Бавария» эса 1,8 та гол урган.

Тахминий таркиблар:

«Барселона»: Марк-Андре тер Стеген — Нелсон Семеду, Жерар Пике, Клеман Лангле, Хорди Альба — Френки де Йонг, Серхио Бускетс, Артуро Видаль — Лионель Месси, Луис Суарес, Антуан Гризманн.

«Бавария»: Мануэль Нойер — Альфонсо Дэвис, Давид Алаба, Жером Боатенг, Йозуа Киммих — Тиаго Алькантара, Леон Горетцка — Серж Гнабри, Иван Перишич, Томас Мюллер — Роберт Левандовски.

Ўйин олдидан мураббийлар қандай фикрда?

Ташвишлантириши мумкин бўлган кўп жиҳатлар бор. «Бавария» жуда яхши жамоа. Уларда прессинг ва ҳимоя тўғри йўлга қўйилган. Кўрамиз, «Бавария»га қандай муаммо туғдира оларканмиз. Ишончим комилки, жамоаларнинг ҳеч бири тотал устунликка эга бўлмайди. Ярим финалга ўз имкониятларидан яхшироқ фойдаланган жамоа йўл олади.Кике Сетьен «Барселона» бош мураббийи

Левандовски ва Мессини таққослаш нотўғри. Левандовски — жаҳон даражасидаги марказий ҳужумчи. У вазиятлардан қойилмақом тарзда фойдаланади ва ўзи ҳам вазиятлар яратиб гол уради. Месси эса сўнгги йилларда яққол устунликка эга бўлган дунёнинг энг яхши футболчиси. У юқори даражадаги ўйинчи. Қачондир яна шундай футболчи туғиладими, йўқми билмайман. Биз Мессини қандай тўхтатиш ҳақида ўйлаб қўйганмиз, аммо буни ошкор қилмайман. Асосийси унга қарши жамоа бўлиб ўйнаш. Ақл билан ўйнаб, унга босим ўтказишга ҳаракат қилиш керак.

Ҳанс Флик «Бавария» устози