Таиланд туристик бошқармаси мамлакатда туристлар учун давлат чегаралари коронавирус пандемияси давом этаётгани ҳамда ҳудудга COVID-19 инфекцияси кириб келиши хавфи борлиги сабаб ёпиқ бўлиши мумкинлигини маълум қилди. Бу ҳақда ТТG Аsia порталига асосланиб, «Интерфакс» хабар берган.
«Таиланд туристик бошқармаси раҳбарининг ўринбосари Чаттан Кунжара На Аюдхя мамлакатда чегараларнинг очилиши борасида расмий маълумот йўқлигини билдирди. Унинг сўзларига кўра, қироллик оиласи мазкур масалага эҳтиёткорлик билан муносабатда бўлмоқда ва 2020 йилда хорижлик сайёҳлар учун мамлакатнинг очиб берилиши муҳокама қилинмаяпти», – деб ёзмоқда нашр.
Аюдхя бу борадаги мавҳумлик туризм очилишига тўсқинлик қилиб, соҳага кучли босим ўтказаётганини таъкидлаган.
«Одатда Рождество – катта даромад келтирадиган мавсум ва унинг бошланиши сўроқ остида қолмоқда. Шунингдек, февралдаги Хитой тақвими бўйича Янги йил байрами борасида ҳам хавотирлар мавжуд», – деган у.
Таиланд ҳукумати мамлакатларда COVID-19 коронавирус инфекцияси билан касалланиш ҳолатлари учраб тургани туфайли «туристик йўлаклар» тузиш лойиҳасини амалга оширишга шошилмаяпти ва Вьетнамдагидек вазият бўлишидан хавотирда.
Шунга қарамай, Таиландда мамлакатни ички туризм доирасида айланиши мумкин бўлган фуқаролар ортиб бормоқда. Улар орасида – дипломатлар, БМТ вакиллари, хизмат сафаридаги шахслар, шунингдек, кўргазмаларга, соғлиқни сақлаш йўлланмаси бўйича келган хорижликлар ҳам саёҳат қилиши мумкин, бироқ улар 14 кунлик карантинда бўлиши талаб этилади.
«Шунингдек, локал ‘туризм йўлаклари’ни ташкил қилиш бўйича ҳам режалар муҳокама қилинмоқда, унга кўра ҳукумат рўйхатига кирган бир қатор хориж давлатларининг фуқаролари 30 кунлик саёҳатга келиши мумкин ва Пхукет ёки Самуига бора олади. Бироқ ҳукумат ҳали ушбу гуруҳларни диққат билан кузатиб, рўйхатни шакллантирмоқда», – дейди Аюдхя.
ТТG Аsia’да ёзилишича мамлакатда туризмни чегаралар ёпиқ шароитда қўллаб-қувватлаш бўйича чораларни кўради. Қиролликда ҳукумат туристик агентликларга кўмак бериш мақсадида Safe and Sealed номли янги режа ишлаб чиқилмоқда ва унинг ижроси 2020 йилнинг тўртинчи чорагида бошланади. Режа бўйича Таиланд курортларига киришга бир ой давомида ҳудудида коронавирусга чалиниши кузатилмаган сайёҳларга рухсат берилади ва уларнинг саёҳати битта тур доирасида амалга оширилади. Сайёҳ суғурта қоғозини ва COVID-19’ни аниқлаш тестининг (72 соат давомида) манфий натижаси хулосасини тақдим этиши, шунингдек, етиб келганидан ПЗР тестини топшириши лозим.
Чора-тадбирлар Таиланддаги туристик компанияларнинг ходимларни ишдан бўшатмаслиги ва чегаралар ёпиқ вазиятда уларни инқирозга учрамаслиги учун ёрдам бериш мақсадида ишлаб чиқилган. Янги режа бўйича камида 1,5 миллион нафар хорижлик сайёҳларни жалб қилинади ва даромад 1,6 миллиард долларга етиши кутилмоқда.
Таиланд туристик бошқармаси раҳбари Ютасака Супасорна пандемия бошлангунига қадар мамлакатдаги туризм тизимида 4 миллион нафар ходим фаолият олиб боргани, бироқ даромаднинг кескин тушиб кетиши оқибатида ишсизлар сони 2,5 миллион кишига етиши мумкинлигини айтган.
Изоҳ (0)