Қирғизистоннинг Ўш вилоятида 8 киши куйдирги сабабли касалхонага ётқизилди

Қирғизистон жанубида саккиз киши куйдирги (Сибир яраси) касаллигида гумонланиб, Ўш вилоятлараро касалхонасига ётқизилган. Бу ҳақда Қирғизистон Соғлиқни сақлаш вазирлигига таяниб, «Интерфакс» хабар берди.

Дастлабки маълумотларга кўра, касалхонага ётқизилганларнинг барчаси касалланган мол гўштидан зарарланган. Лаборатория таҳлили беморлардан бирида ташхисни тасдиқлаган. Улар билан алоқада бўлган 285 киши аниқланган.

Эпидемиологик ўрганишлар давомида аниқланишича, июль ойининг охирида гўшти Тоғуз Бўлак, Талдиқ, Қизил Байроқ ва Беш Мўйноқ қишлоқларидаги 34 та оилага тарқатилган йирик шохли қорамолни сўйиш ва гўштини тарқатишда тўққиз киши қатнашган. Қайд этилишича, алоқада бўлган барча кишилар касалликнинг олдини олиш учун антибиотик дорилар қабул қилмоқда ва тиббий кузатувга олинган.

Соғлиқни сақлаш вазирлиги маълумотларига кўра, қорамол сўйилган жойдаги тупроқ намунасининг лаборатория таҳлиллари куйдирги  борлигини кўрсатган. Бактериологик ва биологик усуллардаги лаборатория таҳлиллари давом этмоқда. Ҳодиса юз берган туманда Сибир яраси ўчоғини ўраб олиш ва касалликни йўқ қилиш бўйича тезкор штаб ташкил қилинган.

Ўш вилоятлараро касалхонаси шифокори Хурсандали Тошовнинг маълум қилишича, касалхонага ётқизилган саккиз кишидан етти нафари Ўш вилояти Қора-Суй туманининг Папан қишлоғида яшовчилар ҳисобланади. Уларнинг аҳволи барқарор эканлиги айтилмоқда.

Куйдирги — одам ва ҳайвонларда учрайдиган ўткир юқумли касаллик бўлиб, у зооноз касалликлар гуруҳига киради. Одамга касал ҳайвонлардан — ҳайвонни сўйиш, гўштини нимталаш вақтида, шунингдек, сув, тупроқ, чорвачилик маҳсулотлари орқали юқади. Одатда касаллик шу соҳа ходимларида, яъни ҳайвонлар билан бевосита мулоқотда бўладиган кишиларда кўпроқ кузатилади. Инфекция соғлом одам организмига нафас йўллари, тери ва оғиз орқали тушиши мумкин.

Қирғизистонда 2018 йилда ҳам 11 киши куйдирги билан касалхонага ётқизилгани ҳақида хабар берилган.