Беларусь президентлиги сайловида Александр Лукашенконинг рақиби бўлган ва сайловдан кейин Литвага кетишга мажбур бўлган Светлана Тихановская ўз болалари билан хавфсиз жойда турибди. Бу ҳақда Литва ташқи ишлар вазири Линас Линкявичюс маълум қилди, деб ёзмоқда Meduza.
Унинг сўзларига кўра, Тихановская давлат томонидан тақдим этилган бошпанада турибди, унга қўриқчилар ажратилган. «Ҳукуматга маълум қилган ҳолда унга жой ажратилган, у меҳмон мақомида», — дея маълум қилган вазир.
Унинг қўшимча қилишича, Тихановская Беларусдан кетишидан олдин унда Литва визаси бўлган. «Унда Литванинг миллий визаси бўлган, бу у Литвада бир йил давомида чекловларсиз қолиши мумкинлигини билдиради. Кўринишидан, бу унинг Литвага кетиш танловини белгилаб берган», — дея таъкидлаган ташқи ишлар вазири.
Вазирнинг қўшимча қилишича, Тихановскаянинг сайловолди штаби раҳбари Мария Мороз ҳам айни пайтда ўз болалари билан Литвада.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Шунингдек, 11 август куни Тихановскаянинг видеомурожаати эълон қилинган. Унда Тихановская ўзининг кетиши «оғир қарор» бўлганини маълум қилган. «Мен дуч келган бундай танловда қолишни Худо кўрсатмасин», — деган Тихановская.
Кейинроқ Беларусь ҳукумати тарафдори бўлган Telegram канал Тихановскаянинг бошқа бир видеомурожаатини эълон қилди. Номзод мазкур мурожаатда камерага қарамасдан, варақдан ўз тарафдорларига қаратилган ва намойишларни тўхтатиш ҳақидаги чақирувни ўқиб берган.
Эслатиб ўтамиз, Беларусда 9 август куни президент сайлови бўлиб ўтди. Пойтахт Минскда президент сайловидан кейин норозилик намойиши бошланган. Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган.
Изоҳ (0)