Ўзбекистон Сенатининг 7 август куни бўлиб ўтган олтинчи ялпи мажлисида Сенат раиси Танзила Норбоева Маҳалла ва оилани қўллаб-қувватлаш вазирлиги шакллантирган ва юритаётган «темир дафтар» тизими айрим ҳудудларда аҳоли норозилигига олиб келаётганини маълум қилди, дея хабар бермоқда «Gazeta.uz».
Президент Шавкат Мирзиёев 30 июль куни «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги фармонни имзолаган эди. Фармонга мувофиқ, бюджетдан қўшимча 2 триллион сўм ажратилиб, ушбу маблағлар 1,7 миллион ёрдамга муҳтож аҳоли, 3,7 миллион пенсионер ва 2020 йил якунига қадар 500 минг нафар ижтимоий нафақа олувчиларга йўналтирилиши белгиланган эди.
Мазкур бир марталик моддий қўллаб-қувватлаш Маҳалла ва оилани қўллаб-қувватлаш вазирлиги ва ҳудудларни комплекс ижтимоий-иқтисодий ривожлантириш бўйича мутасадди идоралар томонидан шакллантирилган моддий ёрдам ва кўмакка муҳтож оилалар рўйхатлари («темир дафтар»)га киритилган оилаларга ажратилиши кўзда тутилган эди. Сенат ялпи мажлисида парламент юқори палатаси раиси Танзила Норбоева мазкур йўналишда учраётган муаммоларга эътибор қаратди ва «темир дафтар»ни шакллантириш ва юритиш тизимини танқид қилди.
Мавзуга доир:
- Сергелида муҳтожларга пул тарқатилиши масаласи кўтарилди. Масъуллар аҳоли билан учрашди
- Ўзбекистонда ёрдам пули тарқатилишига оид эътирозли видеолар тарқалмоқда. Маҳалла вазирлиги хавотирга ўрин йўқлигини билдирди
- Деновда муҳтож оилалардан қайтариб олинган ёрдам пули яна ўша оилаларга қайта тарқатилди
Унинг таъкидлашича, бу борада Маҳалла ва оилани қўллаб-қувватлаш вазирлиги тизим фаолиятини танқидий кўриб чиқиши керак, сабаби одамлар маҳалла тизими вакилларининг нохолислигидан кўп шикоят қилмоқда.
«Президент маҳалла тизими обрўсини кўтариш, халққа янада яқинлаштириш бўйича барча шароит ва имкониятларни яратиб берди. Шунга қарамай, айниқса, қуйи бўғинлар эскича иш услубидан воз кечолмаяпти. Маҳалла идоралари ходимларининг дунёқараши ўзгармаяпти. Уларда аҳоли билан ишлаш, конструктив мулоқот қилиш кўникмалари етишмайди. Бу эса аҳолининг ҳақли эътирозлари кўпайишига олиб келмоқда. Одамларнинг маҳалла идораларига бўлган ишончи ва ҳурматига путур етяпти», — дея таъкидлади Норбоева.
Шу ўринда, маҳалла идоралари вакилларининг малакасини ошириш тизимини тубдан қайта кўриб чиқиши мақсадга мувофиқлиги айтилди. Шунингдек, «темир дафтар»ни шакллантириш ва юритиш тизими очиқ, шаффоф бўлиши, тизимга замонавий ахборот технологияларини жорий этиш муҳимлиги қайд этилди. Айниқса, давлат томонидан муҳтож оилалар учун ажратилган маблағларни тақсимлаш жараёнида инсон омилини максимал даражада қисқартириш бугунги кун талаби экани таъкидлаб ўтилди.
Изоҳ (0)