Коронавирус билан касалланган беморларни шифохонадан ташқарида даволаган тиббиёт ходимлари жазоланади
Коронавирус инфекцияси билан касалланган беморларни белгиланган даволаш-профилактика муассасаларидан бошқа жойларда инекцион ва инфузион дори воситаларидан фойдаланган ҳолда даволаш ва шифокор буюрган муолажаларни амалга ошириш тақиқланди, деб хабар бермоқда Соғлиқни сақлаш вазирлиги.
Соғлиқни сақлаш вазири 2020 йил 6 август куни имзолаган «Коронавирус инфекцияси билан касалланган беморларни даволаш мезонларини тартибга солиш ва ретро-проспектив таҳлил ўтказиш тўғрисида»ги буйруғида бу ҳақда баён қилинган.
Ҳужжатга кўра, коронавирус билан касалланган беморларни даволаш учун мослаштирилган даволаш-профилактика муассасаларидан ташқарида беморларни даволамаслик ва белгиланган муолажаларни олиб бормаслик тўғрисида Ўзбекистондаги барча тиббиёт муассасаларида фаолият юритаётган шифокор ва ўрта тиббиёт ходимларидан кафолат хатлари олинади. Вазирликнинг тиббий хизматлар сифатини назорат қилиш бошқармаси мазкур тартибга амал қилинишини назорат қилади.
Нодавлат тиббиёт ташкилотлари раҳбарларига ҳам ушбу қоидага амал қилиш тавсия этилган. Ушбу тартибга риоя қилмаган ходимлар Соғлиқни сақлаш вазирининг 2020 йилнинг 5 август куни қабул қилинган «Ўзбекистон Республикасида коронавирус инфекциясига қарши курашиш борасидаги ишларни янада такомиллаштириш тўғрисида»ги буйруғига ва COVID-19 билан касалланган беморларни даволаш бўйича вақтинчалик кўрсатмалар»нинг 6-нашрида белгиланган тартиб ва тавсияларга зид ҳаракат қилган деб топилиб, жавобгарликка тортилиши қатъий белгилаб қўйилган.
Аввал 2020 йил 4 августда Соғлиқни сақлаш вазирлиги коронавирусга чалинган беморни амбулатор ва уй шароитида даволашда эътибор қаратиш лозим бўлган жиҳатлар ҳақида маълумот берган, ундан аввал 24 июль куни Коронавирусга қарши курашиш штаби аъзоси Барно Одилова уйда даволанаётган беморлар парваришида аҳамият берилиши керак бўлган жиҳатларга тўхталганди.
