Тошкентда 7 август куни Ўзбекистон Сенатининг олтинчи ялпи мажлиси видеоконференсалоқа шаклида ўз ишини бошлади. Мажлисни Сенатнинг расмий веб-сайти ва ижтимоий тармоқлардаги саҳифалари, шунингдек, UzReport телеканали орқали жонли эфирда кузатиб бориш мумкин.
Сенат ахборот хизматининг маълум қилишича, мажлисда марказий ва ҳудудий студиялардан жами 76 сенатор иштирок этмоқда. Бундан ташқари, марказий ва Вазирлар Маҳкамасидаги студиядан ҳукумат аъзолари, айрим идоралар раҳбарлари, ҳудудий студиялардан Қорақалпоғистон Жўқорғи Кенгеси қўмиталари, халқ депутатлари вилоят ва Тошкент шаҳар Кенгашларининг доимий комиссиялари раислари, Ёшлар парламенти аъзолари ҳамда муҳокама қилинадиган масалалар юзасидан тегишли вазирлик ва идораларнинг ҳудудий тузилмалари раҳбарлари ҳам қатнашмоқда.
Мажлисда 16 та масала, хусусан, 8 та қонун кўриб чиқилиши назарда тутилган. «Таълим тўғрисида»ги, «Аҳоли бандлиги тўғрисида»ги, « ‘Одам савдосига қарши курашиш тўғрисидаъги қонунига ўзгартиш ва қўшимчалар киритиш ҳақида»ги ва бошқа бир қатор қонунлар шулар жумласидан.
Бундан ташқари, «Илм, маърифат ва рақамли иқтисодиётни ривожлантириш йили»да амалга оширишга оид давлат дастурининг 2020 йил биринчи ярим йиллигидаги ижроси юзасидан Вазирлар Маҳкамасининг ҳисоботи, ички ишлар вазирининг ҳуқуқбузарликларнинг олдини олиш ва профилактикаси ҳолати тўғрисидаги ахборотини эшитиш назарда тутилган.
Мажлисда Россияда вақтинча меҳнат фаолиятини амалга ошираётган Ўзбекистон фуқаролари ҳуқуқлари ҳимоясини таъминлаш чора-тадбирлари юзасидан ва бошқа масалалар бўйича Вазирлар Маҳкамасига парламент сўрови юбориш масаласи ҳам режалаштирилган.
Бундан ташқари, кун тартибидан қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш каби жиноятлар содир этилиши ҳолати тўғрисида Бош прокуратура, Ички ишлар вазирлиги, Давлат хавфсизлик хизматига парламент сўровлари юбориш масаласи ҳам ўрин олган.
Изоҳ (0)