Ўзбекистон транспорт вазири Элёр Ғаниев бошқа ишга ўтиши муносабати билан лавозимидан озод этилди. Бу ҳақда ҳукуматдаги манбага асосланиб, «Gazeta.uz» хабар бермоқда. «Kun.uz»нинг қўшимча қилишича, тегишли фармон Президент томонидан 5 август куни имзоланган.
Ғаниев энди қаерда ишлаши, шунингдек, унинг ўрнига ким транспорт вазири лавозимини эгаллаши ҳақида ҳозирча аниқ маълумотлар йўқ.
Элёр Ғаниев 1997—2002 йилларда ташқи иқтисодий алоқалар вазири, 2005—2006 йилларда ташқи ишлар вазири, 2006—2010 ва 2012—2017 йилларда ташқи иқтисодий алоқалар, инвестициялар ва савдо вазири сифатида ишлаган. 2010—2012 ва 2019—2020 йилларда бош вазир ўринбосари бўлган.
Элёр Ғаниев 2020 йил январида Очилбой Раматов ўрнига транспорт вазири этиб тайинланган эди. Транспорт вазирлиги 2019 йил февралида автомобиль, темир йўл, ҳаво, дарё транспорти, метрополитен, шунингдек, йўл хўжалиги соҳасидаги давлат бошқаруви органи сифатида ташкил этилган эди.
Изоҳ (0)