Тергов департаменти Андижон вилояти Жалақудуқ туманидан наркодилернинг ҳибсга олинганини хабар қилди.
Хабарга кўра, 2020 йил 4 август куни соат 12:45 да Жалақудуқ тумани ИИБ ходимлари томонидан ўтказилган тезкор тадбирда 31 ёшли И.А. исмли фуқаро қўлга тушган. У тумандаги «Достонобод» МФЙ ҳудудида 1 дона селофан пакетга солиб қадоқланган соф оғирлиги 937,62 грамм бўлган гашиш гиёҳвандлик моддасини 5 минг АҚШ доллари ва 100 миллион сўм эвазига сотаётган вақтида ашёвий далиллар билан ушланган.
Тезкор тадбир давомида И.А.дан кимёвий ишлов берилган 5 минг АҚШ доллари ва 100 миллион сўм миқдоридаги пуллар холислар иштирокида тегишли тартибда расмийлаштириб олинган.
Ҳолат юзасидан Жалақудуқ тумани ИИБ ҳузуридаги Тергов бўлинмаси томонидан Жиноят кодексининг 273-моддаси 5-қисми (Гиёвандлик воситаларини кўп миқдорда қонунга хилоф равишда сотиш) билан жиноят иши қўзғатилган. И.А. гумон қилинувчи тариқасида ишга жалб қилиниб, процессуал тартибда ушланган.
2020 йил май ойида Андижон вилоятининг Жалақудуқ туманида уйида 840 грамм марихуана гиёҳванд моддасини сақлаб келган шахсга нисбатан жиноят иши қўзғатилгани хабар қилинган.
Шунингдек, 30 июлда Андижон вилояти Қўрғонтепа туманида туғилган О.Қ. мазкур туманнинг «Олтинсой» маҳалласидан ўтган чегара симтўсиқлари устидан қирғизистонлик шахслар ўтказиб берган 978 грамм гашиш моддасини қабул қилиб олиб, ҳаракатланаётган вақтида ушлангани, 31 июлда Тошкент шаҳри, Фарғона, Наманган ва Самарқанд вилоятларида яшовчи 18 нафар шахсдан иборат уюшган жиноий гуруҳ фаолиятига чек қўйилгани ҳақида хабарлар берилган.
Изоҳ (0)