Николя Анелка «Реал»даги фаолиятини қўрқинчли тушга қиёслади

Франция терма жамоаси собиқ ҳужумчиси Николя Анелка ўзи ҳақида суратга олинган «Анелка. Тушунарсиз» ҳужжатли фильмида Мадриднинг «Реал» клубидаги фаолиятини ёдга олди.

Юлдузлик нима эканини «Реал»га ўтганимдан кейин билганман. Бу менга ёқмаганди.

Илк матбуот анжуманидан кейин кийиниш хонасига йўл олдим. У ерга биринчи бўлиб кирдим, бироқ ўйинчилар ёнимга келар ва шундай дерди: «Бу мени жойим». Жавоб қайтарардим: «Узр. Бу ерга ўтирсам бўладими?». Кейин бошқаси келиб жой уники эканлигини айтарди.

Худди шу ҳолат йигирма мартага яқин рўй берди. Ўшанда ўйлаб қолдим: «Бу ерда нима қиляпман? Адоват бўлади». Ўша куни бошдан кечирганим қўрқинчли тушнинг бошланиши эди, холос.

Кўп нарсаларни қурбон қилишга тўғри келди ва мен буни англаш учун жуда ёшлик қилардим. Катта босим бор эди. Ҳар куни газетада мавзусига айланардим. Майдонда ишлар яхши кетмади. Шахсий ҳаётим ҳам бўлиши мумкин эмас эди. Ҳеч нарса қила олмасдим.

Ёшинг 20 да, сен эса кўчада юра олмайсан. Қилаётган барча ишинг муҳокама қилинади. Сотиб олган ҳамма нарсанг газетада эълон қилинади.

Николя Анелка, собиқ футболчи

Франциялик футболчи 1999/2000 йилги мавсумда «Реал» сафида тўп сурган ва жамоа билан Европа Чемпионлар Лигасида ғолиб чиққан.