Украина президенти Валдимир Зеленский Беларусь давлат раҳбари Александр Лукашенко билан телефон орқали қилган суҳбатида «Вагнер» террорчилик гуруҳининг аъзоси бўлган 33 россиялик жангари масаласини муҳокама қилди. Бу ҳақда Meduza хабар қилган.
Владимир Зеленский
Фото: Reuters
«Украина ҳудудида террорчилик фаолиятини олиб борган гумонланувчилар, жиноий жавобгарликка тортилиши учун халқаро-ҳуқуқий ҳужжатлар доирасида мамлакат ихтиёрига топширилишига умид қиламан», — деган Зеленский ҳамкасби билан суҳбатда.
Беларусь президентининг матбуот хизмати Александр Лукашенконинг мамлакат ҳуқуқ-тартибот органлари ушбу масалада Россия ҳамда Украина ўртасида имзоланган келишувлар доирасида ҳамкорликка тайёрлигини билдирганини маълум қилган.
Беларусда «Вагнер» хусусий ҳарбий компаниясининг жангарилари ҳибсга олинганидан кейин, ҳукумат Украинадан уларнинг ушбу мамлакат ҳудудидаги жиноятларга алоқадор ёки алоқадор эмаслигини текширишни сўраган. Украина миллий хавфсизлик ва мудофаа кенгаши ҳам қўлга олинган россияликларни Киев ихтиёрига топшириш юзасидан мурожаат қилган.
Беларусда «Вагнер» ҳарбий гуруҳи аъзолари қўлга олинганидан сўнг ёзувчи Захар Прилепин улар орасида Донецк халқ республикаси баталёнининг собиқ вакиллари борлигини маълум қилган. «Новая газета» қўлга тушганларнинг уч нафари Донбассдаги, етти нафари Суриядаги жанговар ҳаракатларда иштирок этгани ҳақида ёзган. Шунингдек, жангариларнинг 10 нафари Украина фуқаролигига эга кишилар экани хусусида ҳам хабарлар мавжуд.
