Лукашенко Беларусь коронавирус эпидемиясини енгиб ўтганини маълум қилди

Беларусь президенти Александр Лукашенко мамлакат аҳолиси ва парламентига қилган мурожаатида COVID-19 коронавируси эпидемиясига барҳам берилганини маълум қилди. Бу ҳақда «Интерфакс» хабар берган.

«Эпидемия бизнинг жамиятимизнинг мустаҳкамлигини ҳам жиддий синовдан ўтказди. Асосий хулоса: биз ушбу имтиҳондан ўтдик ва офатни енгдик! Сўқир бўлмаган ҳар қандай инсон буни кўра олади!» – деган Лукашенко.

Унинг сўзларига кўра, Беларусь пандемияга имкон даражасида тайёргарликка эга ҳолда кирган.

«Соғлиқни сақлаш тизимини ривожлантириш йўлидаги оқилона қарорлар ва уни такомиллаштириш бўйича катта дастурлар ижроси ҳам ғалабада асосий рол ўйнади», – дейди Лукашенко.

Шунингдек, Беларусь етакчисининг фикрича мамлакатда сақлаб қолинган юқумли касалликлар шифохоналари, санитар хизматлар, етарли койка фонди, диагностика ва даволаш аппаратларининг мавжудлиги ҳам COVID-19’нинг мағлуб қилинишига улуш қўшган.

Шунингдек, Лукашенко янги вирус ҳақидаги маълумотларнинг камлиги, инфекциянинг оммавий равишда тарқалиш хусусияти ҳамда даволаш методикаларининг йўқлигини катта хавф ва салбий жиҳат сифатида қайд этган.

Беларусь давлат раҳбари эпидемия бошида ҳукуматга кучли босим ўтказилганлигини ҳам эслатди.

«Жаҳон соғлиқни сақлаш ташкилотининг барча мамлакатлар учун шаблон тавсиялари – тезкор тарзда карантин жорий қилиш, коммендантлик соати эълон қилиш, чегараларни ёпиш, корхоналар фаолиятини тўхтатиш оғир эди. Мен бундай қарорни қабул қила олмасдим ва ҳозир мени жуда яхши тушунаяпсиз», – деган у.

Унинг фикрича Беларусь ҳукумати пандемия давридаги ҳар бир босқичда энг тўғри, холис қарорларни қабул қилган.

«Ҳозир кўпчилик буни Беларуснинг тўғри йўли деб атамоқда. Кўплаб мамлакатлар ушбу қарорнинг қай даражада тўғри бўлганини тан олди», – дея таъкидлаган Беларусь президенти.

Лукашенко Беларусда беморларни фронтдаги каби саралаш ишлари амалга оширилмаганини ҳам қайд этган, яъни ёшларни даволаб, кексаларга кучли эътибор қаратмаслик ҳолатлари кузатилмаганини билдирган.

Беларусь президенти мамлакатда спорт иншоотлари ва савдо марказлари тиббиёт муассасаларига айлантирилганига эътибор қаратган. Касалхоналардаги койка фондининг ярми ишлатилгани, сунъий нафас олдириш аппаратларининг умумий сонидан 10-11 фоиз қисмидангина фойдаланилганини айтиб ўтган.

Лукашенконининг билдиришича, ҳаммаси силлиқ, локал хатоларсиз кечмаган. Бироқ холис ва тўғри қарорлар билан ушбу камчиликлар бартараф этиб борилган.

Беларусда 9 август куни навбатдаги президентлик сайловлари ўтказилади. Амалдаги давлат раҳбари Алексанр Лукашенко олтинчи марта сайловларда номзод сифатида иштирок этмоқда. Унинг асосий икки рақобатчиси — Виктор Бабарико ҳамда Валерий Цепкало МСКдан ўз номзодларини рўйхатда ўтказа олмаган. Бабарико иқтисодий жиноятларда айбланиб ҳибсга олинган. Цепкало эса қамоққа олиниши мумкинлигидан хавотирланиб Беларусдан чиқиб кетган, дастлаб Москвага, кейинчалик Киевга келган.

Виктор Бабарико ҳибсга олиниши ва МСКнинг Лукашенкога рақобатчи бўлиши кутилаётган асосий номзодларни рўйхатдан ўтказмаслиги ортидан Беларусда оммавий норозилик намойишлари ўтказилди, уларни бостиришга кучишлатар тизим вакиллари жалб қилинди. Юзлаб одамлар қамоққа олинди.