Samsung компанияси ҳамёнбоп линейкасидаги улкан аккумулятор сиғимига эга Galaxy М31 s моделини тақдим этди, деб хабар беради GSM Arena.
Фото: GSM Arena
Янги моделга Full HD+ сифатга эга 6,5 дюймли AMOLED-дисплей ўрнатилган. Экраннинг автоматик режимдаги максимал ёрқинлиги 430 кд/квадрат метга етади, фронтал камера учун кичкина «қирқим» ажратилгани сабаб дисплей гаджетнинг 91 фоиз юзасини эгаллаган. Бармоқ изи сканери ён томондаги қурилмани ўчириб-ёқиш тугмасига жойлаштирилган.
Қурилма ичидан Exynos 9611 процессори, 6 ёки 8 гигабайт тезкор ҳамда 128 гигабайт ички хотира ўрин олади. Смартфон Android 10 операцион тизимида ишлайди. Аккумулятор сиғими 6000 мА/соатга тенг бўлиб, 25 ваттли тезкор қувватланиш функциясига эга. Ишлаб чиқарувчининг маълум қилишича, гаджетни тўлиқ қувватлантириш учун 97 дақиқа кетади.
Фото: GSM Arena
Galaxy М31 s’нинг фронтал камераси 32 мегапикселга тенг. Асосий блокдан эса Sony’нинг 64 мегапиксели модули, тасвирни 123 даража кенгликда суратга олувчи (12 Мп), кадр чуқурлигига мўлжалланган (5 Мп) ҳамда макромодулли (5 Мп) камералар ўрин олган. Камераларнинг ўзига хос функцияси — видео тасвирга олаётганда олд ва орқа камераларни бирдек ишлатиш мумкинлигида, шунингдек, улар ёрдамида тунги суратга олиш ишларини ҳам амалга оширса бўлади.
Фото: GSM Arena
Янги қурилма биринчи бўлиб Ҳиндистонда сотувга чиқади. Расмий нархлар:
- 6/128 Гб — 260 доллар;
- 8/128 Гб — 290 доллар.
Аввалроқ Samsung компанияси Galaxy С20 Lite ҳамёнбоп флагманини тақдим этаган эди.
