Президентнинг 2020 йил 30 июлдаги фармонига асосан Самарқанд вилоятида «темир дафтар»га киритилган 47 770 та оиланинг 10 мингтасига бир миллион сўмдан бир марталик моддий ёрдам пули тўлаб берилган. Қўшимча равишда Қурбон ҳайити арафасида маҳаллий бюджет маблағлари ва ҳомийлар томонидан шу тоифадаги 2000 га яқин оилага жами 2 миллиард сўм моддий ёрдам пули берилган. Бу ҳақда вилоят ҳокими Эркинжон Турдимов маълум қилди, дея хабар берди «Дарё» мухбири.
«Вилоят бўйича 47 770 та ижтимоий ҳимояга муҳтож оиланинг 213 минг аъзосини қўллаб-қувватлаш мақсадида оилаларнинг ҳар бир аъзоси учун 220 минг сўмдан бир марталик ёрдам пули берилмоқда. Вилоят бўйича тарқатилиши белгиланган пул маблағларининг жами қиймати қарийб 47 миллиард сўмни ташкил этади. ‘Саховат ва кўмак’ умумхалқ ҳаракати доирасидаги ишларимиз бундан кейин ҳам давом этади», — дейди Эркинжон Турдимов.
Вилоят ҳокимининг маълум қилишича, Президентнинг 2020 йил 30 июлдаги «Коронавирус пандемияси даврида ижтимоий ҳимояга ва ёрдамга муҳтож аҳоли қатламларини моддий қўллаб-қувватлашга доир қўшимча чора-тадбирлар тўғрисида»ги фармони билан вилоятда тез тиббий ёрдам бригадалари ходимлари рағбатлантирилмоқда.
Хусусан, 1525 нафар врач 5 миллион сўмдан жами 7 миллиард 625 миллион сўм, 1782 нафар ўрта тиббиёт ходими 4 миллион сўмдан 7 миллиард 128 миллион сўм, 1360 нафар ҳайдовчи 3 миллион сўмдан жами 4 миллиард 80 миллион сўм, вилоят бўйича 4667 нафар соҳа ходимига жами 18 миллиард 833 миллион сўм берилган.
Шунингдек, пенсия, ногиронлик ва боқувчисини йўқотганлик нафақаси олувчилар учун 311 миллион 217 минг сўм маблағ тўлаб берилган. Маҳалла фуқаролар йиғини орқали 2 ва 14 ёшгача нафақа ва моддий ёрдам олувчилар учун фармонгача 126 миллион сўм нафақа ва 48 миллион сўм моддий ёрдам тўланган бўлса, фармондан кейин 150 миллион сўмлик нафақа 63 миллион сўмлик моддий ёрдам тўланган.
Изоҳ (0)