Имзо учун 11 млн ва йилига 8,6 млн евро маош. «Реал» 2013 йилда Левандовскига таклиф қилган шартнома тафсилотлари маълум бўлди

Польшанинг Onet Sport нашри «Реал» 2013 йилда Роберт Левандовскига таклиф қилган шартнома тафсилотларини эълон қилди.

У вақтда «Боруссия Дортмунд»да фаолият юритаётган ҳужумчи «Бавария» билан оғзаки келишувга эга бўлган.

«Реал» бош директори Хосе Анхель Санчес ва президент офиси раҳбари Мануэль Редондо томонидан тақдим этилган шартнома 6 йилга мўлжалланган: 2014 йилнинг июлидан 2020 йилнинг июнига қадар.

Левандовски шартномага рози бўлганда солиқлар билан ҳисоблаганда 10,9 миллион еврога эга бўларди. Бу миқдорнинг 1,9 миллиони полшалик футболчига дарҳол берилиши, шунингдек, шартноманинг ҳар бир йилига 1,5 миллион евро тўланиши кўрсатилган.

Левандовскига солиқлар билан ҳисоблаганда йиллик 8,6 миллион евро маош таклиф этилган.

Шунингдек, шартномада ўйинчи учун бир қатор чекловлар санаб ўтилган: мотоциклда юриш, моторли қайиқ сузиш, чанғи учиш, парашютдан сакраш ва чўққига чиқиш билан шуғулланиш тақиқланган.

Эслатиб ўтамиз, Левандовски 2014 йилнинг ёзида дортмундликлар сафидан эркин агент сифатида «Бавария»га кўчиб ўтади. 31 ёшли ҳужумчи ҳозиргача мюнхенликлар клубида тўп суради.