Apple компаниясининг янги маҳсулотлари тақдимоти сентябрь ойидан бошқа санага кўчирилади. Бу ҳақда компания молиявий директори Лука Маэстрига таяниб, Bloomberg хабар берди.

Фото: AP Photo

Унинг сўзларига кўра, iPhone’ларнинг янги авлоди тақдимоти одатдагидан «бир неча ҳафта кейинроқ» бўлиб ўтади. Маэстрининг таъкидлашича, компания смартфонларни октябрда тақдим этиш ниятида.

Шунингдек, Apple 27 июль куни якунланган 2020-молиявий йилнинг учинчи чораги бўйича ўз кўрсаткичларини тақдим этди. Ўтган чорак давомида компания даромади 59,7 миллиард долларни ташкил этган бўлиб, бу 2019 йилнинг шу даврига нисбатан 11 фоизга кўп демак. Учинчи чоракда Apple’нинг соф даромади 12 фоизга ортиб, 11,253 миллиард долларга етган.

Чорак давомида акциялар учун соф фойда 2,58 долларни ташкил этган — 18 фоиз ўсиш. Халқаро савдолар эса чорак даромадининг 60 фоизини ташкил этган.

Маэстрининг қайд этишича, июнь ойидаги натижалар Apple оғир дамларда ҳам инновацияни жорий этиш қобилиятига эгалигини исботлаб берган. «Ушбу чоракда биз акцияларнинг соф фойдасини 18 фоизга, соф даромадни эса 16,3 миллиард долларга қадар оширишга эришдик — иккала ҳолатда ҳам рекорд кўрсаткичлар», — дейди компания молиявий директори.

Аввалроқ Жон Проссер исмли инсайдер Apple компанияси коронавирус сабаб саккиз йилдан бери биринчи бор янги iPhone моделлари тақдимотини сентябрь ойидан бошқа санага кўчиришга мажбур бўлгани тўғрисида хабар берганди.