Ҳозирда Ўзбекистон Соғлиқни сақлаш вазирлиги ҳузуридаги COVID-19’га қарши курашиш марказий штабида коронавирус инфекцияси тарқалишининг олдини олиш бўйича маслаҳатчи бўлиб ишлаётган германиялик профессор Вернер Бер «Kun.uz»га берган интервьюсида «Плаквенил»ни қўллаш бўйича аниқ кўрсатма йўқлигини маълум қилди.

Фото: «Kun.uz»

«Тахминан икки ой олдин, мендан инфекция тарқалишини чеклашга ёрдам бериш учун бу ерга келишимни сўрашди, аммо вазият бошқача эди. Вазият ўзгаргани сабабли, вазирлик яна лойиҳалар ишлаб чиқиш ва Ўзбекистонда коронавирус эпидемиясини чеклашга ёрдам бериш бўйича таклифлар киритиш учун келишимни илтимос қилди. Вазият умидсиз эмас, аммо фуқаролар коронавирус эпидемиясига қарши курашишда ҳамкорлик қилишлари жуда муҳимдир», — дейди германиялик профессор.

Вернер Бернинг сўзларига кўра, коронавирусга қарши курашда Ўзбекистондаги соғлиқни сақлаш тизимининг ишини 1 дан 10 гача бўлган шкалада саккиз баҳога тортади. У ҳозирга қадар тақсимлаш маркази ва кўплаб клиникаларга ташриф буюргани, мамлакатнинг тиббий таъминоти унчалик ёмон эмаслиги, яхшиланиши керак бўлган баъзи жиҳатлар мавжудлигини таъкидлаган. Хусусан, профессор ПЗР тести уч кун давом этмаслиги кераклигини, ҳозирда замонавий ускуналар сизга бир неча соат ичида натижага эришишга имкон беришини қайд этган.

«Германияда биз ҳам ушбу муаммога дуч келдик, шунинг учун сизлардаги каби тақсимлаш марказларини ташкил қилдик. Яхшиямки, Германияда бу керак бўлмади. Аммо агар биз Италия, Испания ва Франция каби давлатларни олсак, улар ҳақиқатан ҳам жиддий муаммога дуч келди, бу мамлакатларда тиббий ходимлари ва имкониятлари етишмаслиги сабабли ҳаттоки ушбу давлатлар бўлган беморлар Германияга ҳам келишди», — дейди Вернер Бер.

Шунингдек, германиялик мутахассис «Плаквенил» дори воситасининг фойда бериш ёки бермаслиги борасидаги фиклари билан ҳам бўлишган:

«Кўпгина институт ва марказларда ушбу касаллик бўйича тадқиқотлар олиб борилмоқда. Табиийки, ҳозир айтаётганим вақт ўтиши билан ўзгариши мумкин. ‘Плаквенил’ препаратига келсак, дастлаб унинг самарадорлигини кўрсатадиган илмий иш олиб борилди, аммо ишончли натижалар ҳақида гапириш учун беморлар сони кам эди. Кўп сонли беморлар билан ўтказилган кейинги тадқиқотлар ‘Плаквенил’нинг самарадорлигини кўрсатмади. Баъзи тадқиқотлар ҳатто ушбу препаратнинг кардио зарарлигини кўрсатди. Шу тариқа, ҳозирги пайтда дунёда ушбу препаратни қўллаш бўйича аниқ кўрсатма йўқ. ЖССТ препаратни коронавирусни даволаш учун тавсия этилган терапевтик воситалар рўйхатидан чиқариб ташлади».

Вернер Бер бир неча ҳафтадан сўнг Ўзбекистон коронавирус чўққисидан ўтилиши ва касалланиш ҳолатлари сони пасайишини, аммо бунда аҳолининг тартиб-интизоми муҳим рол ўйнашини маълум қилган.

Аввалроқ «Плаквенил»ни даволаш протоколлардан чиқариб ташлаш ҳақида гапирган «Тез ёрдам» кўрсатуви экспертига таҳдид бўлгани тўғрисида хабар берилганди. Жаҳон соғлиқни сақлаш ташкилоти гидроксихлорохиннинг коронавирусни даволашдаги салбий таъсирини тасдиқлагач, бу дори Ўзбекистонда амал қилаётган энг сўнгги қўлланмадан ҳам чиқариб ташланди.