Ички ишлар вазирлиги матбуот котиби Шоҳрух Ғиёсов мажбурий «план» иш услубидан буткул воз кечилганини айтди.
Аҳолидан келиб тушган «Охирги вақтларда ижтимоий тармоқларда ички ишлар ходимларининг қийин аҳволга тушиб қолганликлари, ойликлари етмаётганлиги, раҳбарлар томонидан мажбурий ‘план’ қўйилиши ва ҳоказо қийинчиликлар ҳақида овозли ёзувлар тарқалмоқда. Шунга изоҳ берсангиз», деган саволига Ғиёсов қуйидагича жавоб берган:
«Мажбурий план масаласига келадиган бўлсак, бундай номақбул иш услубидан умуман қутулганимиз, ҳозирда ходимларимизга бундай талаблар қўйилмайди. Агар кимда бу ҳақда маълумот бўлса, 1102 ишонч телефонига қўнғироқ қилиши мумкин, биз ижрочига ҳам раҳбарига ҳам қаътий чора кўрамиз. Шахснинг сир сақланиши кафолатланади».
Шунингдек, Ички ишлар вазири матбуот котиби бугунги кунда ички ишлар органларига қўйилаётган юклама анча ошгани, аммо ходимлар ҳар қандай вазиятда олдиларига қўйилган вазифани бажаришини билдирди.
«Тан олишимиз керак, ҳақиқатда ҳам пандемия шароитида ходимларимизни ижтимоий муҳофаза ва ҳимояси билан боғлиқ масалаларда жиддий камчиликлар борлиги кўринди. Биз ҳозир бу масала устида ишлаяпмиз, улар тизимли равишда ҳал этилади», — дейди Ғиёсов.
Эслатиб ўтамиз, аввалроқ ижтимоий тармоқларда Тошкент шаҳар Олмазор тумани ички ишлар органлари фаолиятини мувофиқлаштириш бошқармасида бўлиб ўтган мажлисдан ёзиб олингани тахмин қилинган овозли хабар тарқалгани ва овознинг Олмазор тумани ИИО ФМБ Ҳуқуқбузарликлар профилактикаси бошқармаси махсус топшириқлар бўйича инспектори подполковник Фаррух Холовга тегишли экани ҳақида хабар берилганди. Шундан сўнг Олмазор тумани ИИО ФМБ ходимига нисбатан хизмат текшируви белгиланганини маълум қилган. Ички ишлар вазири маслаҳатчиси, генерал-полковник Зокиржон Алматов эса июнь ойида «Kun.uz»га берган интервьюсида йўл-патруль хизмати инспекторлари мисолида ички ишлар органлари ходимларидан «Бугун нечта протокол қилдинг?» деб сўраш одатига чек қўйилганини айтганди.
Изоҳ (0)