Тошкент ва Андижон вилоятларида қонунга хилоф равишда гиёҳванд моддаларини сақлаган фуқаролар қўлга олинди, деб хабар беради «Дарё»га ДХХ.
Қайд этилишича, ДХХ Чегара қўшинлари ҳарбий хизматчилари томонидан Тошкент вилоятининг Бекобод тумани «Хонобод» МФЙ Ширинбулоқ аҳоли яшаш масканида ўтказилган тезкор қидирув тадбири давомида маҳаллий фуқаро 1988 йилда туғилган Ш.А. 10 килограмм 130 грамм опий ва 19 килограмм 74 грамм гашиш моддаси билан ушланди.
Аниқланишича, мазкур гиёҳвандлик моддасини унга тожикистонлик таниши Ўзбекистон—Тожикистон ўртасидаги чегара сим тўсиқлари остидан ўтказиб берган.
Муқаддам судланган Ш.А. гиёҳванд моддаларини Тошкент шаҳрида сотишни режалаштирган.
Шу билан бирга, Бўстон тумани ҳудудидаги ЙПХ масканида Андижон–Тошкент йўналишида ҳаракатланиб кетаётган Cobalt русумли автомашина тўхтатилиб текширилди. Натижада машинада йўловчи сифатида кетаётган 1983 йилда Пахтаобод туманида туғилган С.Й.га тегишли бўлган целлофан пакет ичидан 1 килограмм 446 грамм гашиш моддаси топилган.
Аниқланишича, С.Й. гиёҳванд моддани Қирғизистоннинг Қора-Су шаҳрида яшовчи Азиз исмли шахсдан олиб, айланма йўллар орқали Андижон вилояти ҳудудига олиб ўтган ва сотиш мақсадида Тошкент шаҳрига кетаётган бўлган.
Шунингдек, 1988 йилда Андижон вилояти Қўрғонтепа туманида туғилган О.Қ. мазкур туманнинг «Олтинсой» маҳалласидан ўтган чегара сим тўсиқлари устидан қирғизистонлик шахслар ўтказиб берган 978 грамм гашиш моддасини қабул қилиб олиб, ҳаракатланаётган вақтида ушланган.
Яна бир шунга ўхшаш ҳолатлардан яна бири Ветеран жангчи-фахрий ва ногиронлар бирлашмасининг Андижон вилояти Хўжаобод туман бўлими раиси 1969 йилда туғилган Ш.С. ва 1992 йилда туғилган А.Ў. мазкур туманнинг Манак қишлоғининг Қирғизистоннинг Ўш шаҳри Суратош қишлоғи билан чегарадош ҳудудидаги чегара сим тўсиқлари орқали қирғизистонлик шахсдан 971 грамм гашиш гиёҳвандлик моддасини қабул қилиб олиб, чегараолди ҳудудда ҳаракатланаётган вақтида ДХХ ЧҚ ҳарбий хизматчилари томонидан қўлга олинган.
Ўтказилган тезкор тадбирлар давомида жами 10 килограмм 130 грамм опий ва 22 килограмм 469 грамм гашиш гиёҳванд моддалари мусодара қилинган.
Ҳозирда мазкур ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Изоҳ (0)