АҚШ президенти Дональд Трамп мамлакатда 2020 йил ноябрда бўлиб ўтиши режалаштирилган президентлик сайловларини бошқа муддатга кўчиришни таклиф қилди.
Трамп Twitter’даги саҳифасида почта орқали берилган овозлар энг ноаниқ ва тарихдаги энг ҳийлакор бўлади, деб ҳисоблаши ҳақида пост қолдирган. «Бу АҚШ учун катта муаммо бўлиши мумкин. Сайловларни ҳамма одамлар хотиржам ва хавфсиз овоз бера оладиган шароитга келгунимизгача қолдирамизми?» — дея ёзган Трамп.
Associated Press нашрининг қайд этишича, почта орқали овоз беришда фирибгарлик ҳолатлари кузатилиши мумкинлигига алоқадор ҳеч қандай далил-исбот мавжуд эмас. АҚШнинг бешта штатида почта орқали овоз берилади ва қалбакилаштиришнинг олдини олиш учун тегишли хавфсизлик чоралари кўрилган.
Аввал Дональд Трамп масофадан туриб овоз бериш унинг қайта сайланишига халақит қилиши мумкинлиги ҳақида гапирганди. «Менимча, бу мамлакат тарихидаги энг коррупциялашган сайлов бўлади», — деган эди Трамп июнь ойида Аризонада ўз тарафдорлари қаршисида сўзлаган нутқида.
АҚШ коронавирус инфекциясининг одамлар орасида тарқалиши бўйича дунёда биринчи ўринни эгаллаб турибди. Жонс Ҳопкинс университети юритаётган статистикага кўра, АҚШда 4,4 миллион нафардан кўпроқ одамда COVID-19 аниқланган, 150 мингдан зиёд киши касаллик асоратлари оқибатида вафот этган, 1,4 миллион киши инфекциядан тузалган.
Аввал Twitter, Facebook ва YouTube ижтимоий тармоқлари коронавирусга қарши дори воситаси мавжудлигини таъкидлаган бир гуруҳ шифокорларнинг видеосини ўчириб ташлаган. Ушбу видеони АҚШ президенти Дональд Трамп ўзининг Twitter’даги саҳифаси орқали бўлишган, ижтимоий тармоқ эса уни ишончсиз маълумот, дея ўчириб юборгани хабар қилинганди. Шунингдек, Twitter АҚШ президентининг ўғли кичик Дональд Трампнинг аккаунтини, у гидроксихлорохин рекламасини жойлагани учун блоклаган.
Изоҳ (0)