Инвесторлар Хитойнинг ByteDance компаниясига тегишли TikTok сервисини 50 миллиард долларга баҳолади. Бу ҳақда Reuters вазиятдан хабардор ўз манбаларига таяниб маълум қилди.
Маълумотларга кўра, сервиснинг 2020 йил якунлари бўйича кўрадиган фойдаси бир миллиард долларга етиши прогноз қилинмоқда.
ByteDance АҚШ томонидан бўлаётган босимлар фонида TikTok назоратидан воз кечиш учун бир нечта таклифларни кўриб чиқмоқда.
Таъкидланишича, Америка ҳукумати сервисни Хитой ҳукумати фойдасига ишлашда гумонлаб, унинг фаолиятини чеклашга уринмоқда. Масалан, Америкада давлат идоралари ходимларига хизмат қурилмаларида TikTok’дан фойдаланиш тақиқлаб қўйилган.
Reuters манбаларига кўра, ByteDance бирор бир келишувга рози бўлишига ишонч йўқ. Шунингдек, TikTok’ни фақат Америка бизнесига сотиш, мустақил директорлар кенгашини тузиш ёки янги холдинг бошқарувида хизмат кўрсатиш имкониятлари кўриб чиқилмоқда.
Ҳозирча ByteDance ҳеч қандай қарор қабул қилмаган. Компания вазиятга изоҳ беришдан бош тортган.
Аввалроқ Хитой «социализм қадриятларидан чекингани учун» TikTok’ка эгалик қилувчи компанияни жазолагани тўғрисида хабар берилганди. Май ойида TikTok дастур ичида пул ишлаш борасида YouTube ва Netflix’ни ортда қолдирган.
TikTok қисқа мусиқий видео яратишга, жонли эфирларни амалга оширишга ва хабар алмашишга имкон берувчи ижтимоий тармоқ сервиси ҳисобланади. 2016 йилнинг сентябрь ойида ишга туширилган дастур Хитойда қисқа видеолар бўйича етакчи ижтимоий тармоқ ҳисобланади.
Изоҳ (0)