Қорақалпоғистонда туман ИИБ бошлиғи хизмат машинасида пиёдани уриб юбориши оқибатида 23 ёшли йигит ҳалок бўлди

Қорақалпоғистон Республикаси Қораўзак тумани Ички ишлар бўлими бошлиғи хизмат машинасида 1997 йилда туғилган йигитни уриб кетди, дея хабар бермоқда Республика прокуратураси.

Қайд этилишича, 2020 йил 22 июль куни соат 21:40 ларда Қораўзак тумани Ички ишлар бўлими бошлиғи Р.М. ўзига бириктирилган Nexia-3 русумли хизмат автомашинасини Қораўзак тумани «Бердақ» ОФЙ ҳудудидан ўтувчи Нукус—Чимбой—Тахтакўпир йўлида бошқариб кетаётиб йўлнинг четида велосипедда ҳаракатланиб бораётган Қораўзак тумани «С.Камалов» ОФЙда яшовчи 1997 йил туғилган фуқаро Н.А.ни уриб юборган.

Оқибатда фуқаро Н.А. олган тан жароҳатлари натижасида ўзига келмасдан вафот этган.

Мазкур ҳолат юзасидан Жиноят кодексининг 266-моддаси 2-қисми (Одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилди.

Ҳозирда мазкур иш юзасидан тергов ҳаракатлари олиб борилмоқда.