Қашқадарё ҳокими: Вилоятдаги тез ёрдам машиналарининг 80 таси эскирган, тизимда 15 та машина етишмайди
Қашқадарё вилоятидаги мавжуд 234 та тез ёрдам машиналарининг 80 таси эскириб талабга жавоб бермайдиган бўлиб қолган бўлса, тизимда 15 та машина етишмайди. Бу ҳақда Зоир Мирзаев иштирокидаги брифингда маълум қилинди, дея хабар берди «Дарё» мухбири.
Зоир Мирзаевнинг маълумот беришича, вилоятда айни кунда 147 та тез тиббий ёрдам пости мавжуд бўлиб, унда 234 та тез ёрдам машинаси фаолият кўрсатади.
«Тез ёрдамга кунига 3200 тача телефон қўнғироқлари бўлади. Битта бригада ўртача 15-20 тача чақириққа чиқишга улгурмоқда», — деди вилоят раҳбари.
Зоир Мирзаевнинг таъкидлашича, вилоятдаги мавжуд тез тиббий ёрдам машинасининг 80 таси эскирган, шунингдек, тизимда 15 та машинага талаб бор.
«Тизимда етишмаётган 15 та машинани 2020 йил 1 августгача олиб келамиз ва керакли жойларга етказиб берамиз», — деди вилоят раҳбари.
Маълум қилинишича, 2020 йил 23 июль ҳолатига кўра, вилоятда коронавирусдан касалланганлар 496 нафарни ташкил қилмоқда. Шундан 415 нафари эркак, 81 нафари аёл ва 16 нафарини вояга етмаганлар ҳисобланади. Айни кунга қадар вилоятда 363 нафар бемор соғайган бўлса, даволанаётганлар сони 131 нафарни ташкил қилади.
Қайд этилишича, 2020 йил 16 мартдан буён вилоятда 22 минг 239 нафар фуқаро карантинга олинган бўлиб, айни кунгача 19 минг 869 нафари карантиндан чиққан. Ҳозирда 2370 нафар фуқаро карантинда сақланмоқда.
