Qashqadaryo viloyatidagi mavjud 234 ta tez yordam mashinalarining 80 tasi eskirib talabga javob bermaydigan bo‘lib qolgan bo‘lsa, tizimda 15 ta mashina yetishmaydi. Bu haqda Zoir Mirzayev ishtirokidagi brifingda ma’lum qilindi, deya xabar berdi “Daryo” muxbiri.
Zoir Mirzayevning ma’lumot berishicha, viloyatda ayni kunda 147 ta tez tibbiy yordam posti mavjud bo‘lib, unda 234 ta tez yordam mashinasi faoliyat ko‘rsatadi.
“Tez yordamga kuniga 3200 tacha telefon qo‘ng‘iroqlari bo‘ladi. Bitta brigada o‘rtacha 15-20 tacha chaqiriqqa chiqishga ulgurmoqda”, — dedi viloyat rahbari.
Zoir Mirzayevning ta’kidlashicha, viloyatdagi mavjud tez tibbiy yordam mashinasining 80 tasi eskirgan, shuningdek, tizimda 15 ta mashinaga talab bor.
“Tizimda yetishmayotgan 15 ta mashinani 2020-yil 1-avgustgacha olib kelamiz va kerakli joylarga yetkazib beramiz”, — dedi viloyat rahbari.
Ma’lum qilinishicha, 2020-yil 23-iyul holatiga ko‘ra, viloyatda koronavirusdan kasallanganlar 496 nafarni tashkil qilmoqda. Shundan 415 nafari erkak, 81 nafari ayol va 16 nafarini voyaga yetmaganlar hisoblanadi. Ayni kunga qadar viloyatda 363 nafar bemor sog‘aygan bo‘lsa, davolanayotganlar soni 131 nafarni tashkil qiladi.
Qayd etilishicha, 2020-yil 16-martdan buyon viloyatda 22 ming 239 nafar fuqaro karantinga olingan bo‘lib, ayni kungacha 19 ming 869 nafari karantindan chiqqan. Hozirda 2370 nafar fuqaro karantinda saqlanmoqda.
Izoh (0)