Ўзбекистонда коронавирус инфекцияси кенг тарқалишига қарши курашишда дори воситалари, тиббий буюмлар ва тиббий техникалар тақчиллигининг олдини олиш, шунингдек, коронавирус билан касалланган беморларга ўз вақтида тиббий ёрдам кўрсатилишини таъминлаш мақсадида дори воситалари ва тиббий буюмлар ва техникаларни импорт қилиш тартиби соддалаштирилди. Бу Вазирлар Маҳкамасининг «Коронавирус пандемияси даврида дори воситалари, тиббий буюмлар ва тиббий техникалар муомаласини тартибга солишга доир чора-тадбирлар тўғрисида»ги қарорида белгиланди.
Қарорга кўра, 2020 йил 1 октябрга қадар бўлган муддатда мазкур қарорда кўрсатилган тиббий буюмлар ва тиббий техникалар, шу жумладан, кислород концентраторлар, пульсоксиметрлари ҳамда цинк, магний, селен ёки D витамин моддаларини сақловчи биологик фаол қўшимчалар импорт қилинганда ва маҳаллий ишлаб чиқарувчи корхоналар томонидан ишлаб чиқарилганда давлат рўйхатидан ўтказилмасдан ва мажбурий сертификатлаштирилмасдан божхона расмийлаштирувини амалга ошириш ва реализация қилишга рухсат берилди.
Шунингдек, 1 октябрга қадар мазкур қарорда кўрсатилган рўйхатдаги дори воситалари импорт қилинганда ва маҳаллий ишлаб чиқарувчи корхоналар томонидан ишлаб чиқарилганда уларни давлат рўйхатидан ўтказмасдан ҳамда 5 кунлик муддатда сертификатлаштириш (фақат айрим кимёвий таҳлилларни ўтказган ҳолда) асосида божхона расмийлаштирувини амалга ошириш ва реализация қилишга ҳам рухсат этилди.
Ўзбекистон Республикасига коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссиясига Соғлиқни сақлаш вазирлиги ва Фармацевтика тармоғини ривожлантириш агентлигининг қўшма хулосаси асосида мазкур қарорда кўрсатилган дори воситалари ҳамда тиббий буюмлар ва техникалар рўйхатга қўшимчалар ва ўзгартиришлар киритиш ҳуқуқи берилди.
Қарорга мувофиқ, соддалаштирилган тартиб асосида тиббий буюм, тиббий техникалар, шу жумладан кислород концентраторлар, биологик фаол қўшимчалар ва дори воситалари импорти билан шуғулланувчи ва маҳаллий ишлаб чиқарувчи корхоналар маҳсулот сифати ва хавфсизлиги учун жавобгар ҳисобланади ҳамда ўзлари томонидан реализация қилинган маҳсулот ҳақидаги маълумотларни маҳсулот реализация қилинган кундан бошлаб 5 кун ичида Фармацевтика тармоғини ривожлантириш агентлигига тақдим этиши шарт.
Шу билан бирга, мазкур компаниялар дори воситаларини айрим кимёвий таҳлилларни ўтказган ҳолда сертификатлаштириш учун дори воситасининг қадоғида халқаро патентланмаган номини ўзбек, рус ёки инглиз тилида кўрсатилишини таъминлаган ҳолда ишлаб чиқарувчи корхонанинг синов баённомасини ва синов усуллари кўрсатилган ҳужжатни тақдим этиши лозим.
Қарор билан дори воситалари, тиббий буюмлар ва тиббий техникаларнинг Ўзбекистон ҳудудидан ташқарига олиб чиқилиши 2020 йил 1 октябрга қадар вақтинчалик тўхтатилади, реэкспорт божхона режими бундан мустасно.
Бунда, айрим дори воситалари, тиббий буюмлар ва тиббий техникаларни экспорт қилишга рухсат Республика махсус комиссияси томонидан Иқтисодий тараққиёт ва камбағалликни қисқартириш вазирлиги ҳамда Фармацевтика тармоғини ривожлантириш агентлигининг қўшма хулосаси асосида рухсат берилади.
Коронавирус пандемияси ҳамда санитария-эпидемиологик вазиятдан келиб чиқиб, дори воситалари ва тиббий буюмларнинг экспорт қилинишига бўлган чеклов муддатидан олдин бекор қилиниши мумкин.
Транспорт вазирлиги мазкур қарор ижроси доирасида дори воситалари, тиббий буюмлар ва тиббий техникаларни Ўзбекистонга олиб келиш юзасидан авиарейсларни ташкил этиш таклифини билдирган ташаббускорларга амалий ёрдам кўрсатади.
Аввалроқ Шавкат Мирзиёев кислород концентраторларини Ўзбекистонга олиб келиш учун махсус самолёт ажратиш ҳақида кўрсатма берганди.
Изоҳ (0)