Республика махсус комиссияси марказий штаби ходими Жўшқин Қосимовнинг сўзларига кўра, 22 июль соат 10:00 ҳолати бўйича Ўзбекистонда уй шароитида коронавирус инфекциясидан даволанаётганлар сони 1706 нафарни ташкил қилмоқда. У бу ҳақда «Ўзбекистон 24» телеканалининг эфирида маълум қилган.
«Ҳозирги кунда республика бўйича уй шароитида коронавирусдан даволанаётганлар 2020 йил соат 10:00 ҳолатига кўра 1706 нафарни ташкил қилади. Ҳудудлар кесимида айтсак, Қорақалпоғистон Республикасида 58 нафар, Андижон вилоятида 136 нафар, Жиззах вилоятида 22 нафар, Навоий вилоятида 40 нафар, Наманган вилоятида 21 нафар, Самарқанд вилоятида 96 нафар, Сирдарё вилоятида 156 нафар, Сурхондарё вилоятида 101 нафар, Қашқадарё вилоятида 21 нафар, Тошкент вилояти ва Тошкент шаҳрида 1050 нафар бемор уйда даволанмоқда», — деган Жўшқин Қосимов.
Шунингдек, республика махсус штаби аъзоси беморлар шифокорлар назорати остида экани, улар учун махсус қўлланма ишлаб чиқилгани, бепул дори-дармонлар, тиббий ниқоблар, антисептик ва гигиена воситалари етказиб берилганини билдирган.
2020 йил 10 июлда Коронавирусга қарши кураш штаби аъзоси Ҳабибулла Оқилов коронавирусни уй шароитида даволаш шартлари, ичилиши мумкин бўлган дори турларини маълум қилган. Икки кун ўтгач Соғлиқни сақлаш вазирлиги COVID-19’нинг аломатсиз шакли билан касалланганларни уй шароитида даволаш ва эпидемиологик суриштирув ўтказиш тартиби белгилагани ҳақида хабар берилган.
20 июлда Олий Мажлис Қонунчилик палатаси депутати Дониёр Ғаниев коронавирус пандемиясининг иккинчи тўлқини мамлакат тиббиёт тизими босимга тайёр эмаслигини очиқ-ойдин кўрсатиб қўйганини маълум қилган ва ўзининг Telegram’даги канали орқали Тошкент шаҳрида йўл қўйилган хатолардан тўғри хулоса чиқарган ҳолда, ҳудудларни иккинчи тўлқин босимига тайёрлаш чораларини кўришни тавсия этган.