Халқ таълими вазирлиги ва Coursera йирик онлайн таълим платформаси ҳамкорлигида Coursera Workforce Recovery дастури доирасида таълим тизимида фаолият кўрсатиб келаётган ходимлар, умумтаълим мактаблари ўқитувчилари ва юқори синф ўқувчилари учун бепул онлайн ўқув курслари ташкил этилмоқда. Бу ҳақда вазирлик матбуот хизмати хабар берди.

Фото: The learning counsel

Одатда бундай курслар ва мутахассисликларда таълим олиш учун ойлик обуна нархи 39-79 долларни ташкил этади. Халқ таълими вазирлиги 430 та йўналиш бўйича 3800 турдаги ўқув курсларида бепул таълим олиш имкониятини яратади. Онлайн курслар инглиз ёки рус тилларида олиб борилади.

Дастур доирасида мактаб битирувчилари ва юқори синф (10—11-синфлар) ўқувчиларини келажакда касбга тайёрлашда қўшимча зарур билимларни эгаллашлари учун Coursera платформасида мавжуд фойдали курслар рўйхати шакллантирилади ҳамда улар бўйича онлайн таълим олишлари таъминланади.

Coursera онлайн курсларини муваффақиятли тугатган ўзбекистонлик ўқитувчи ва ўқувчилар халқаро миқёсда тан олинган сертификатларга эга бўлиши ва қўшимча даромад олиши мумкин. Ушбу сертификат дунёнинг ривожланган давлатларида, хусусан, АҚШ, Канада, Австралия ва кўплаб Европа мамлакатларида тан олинади.

Мазкур курсларда таълим олиш учун тингловчилардан инглиз тили ёки рус тилини билиш даражаси камида B1 бўлиши талаб этилади.