Coca-Cola Суперлига 10-туридан ўрин олган «Навбаҳор» — «Сурхон» учрашуви Тошкентда ўтказилади. Бу ҳақда наманганликлар клуби матбуот хизмати маълум қилди.
Таъкидланишича, пандемия сабаб юзага келган ҳозирги шароитдан келиб чиқиб, жамоалар ўзаро келишган ҳолда шу қарорни қабул қилган. Ўйин пойтахтдаги «Локомотив» стадионида ўтади. Тақвимга кўра, учрашувга «Сурхон» мезбонлик қилиши керак эди. Ўзаро келишувга кўра, Тошкентдаги ўйинда «Навбаҳор» номинал мезбон бўлади. Иккинчи даврадаги «Сурхон» мезбонлик қиладиган ўйин ҳам Тошкентда бўлиб ўтади.
Профессионал футбол Лигаси (ПФЛ) мазкур маълумотга қадар ҳеч қандай ахборот бермаган эди. «Навбаҳор» матбуот хизмати бироз вақт ўтиб, ушбу баёнотни ПФЛ рухсатисиз эълон қилгани учун ташкилотдан узр сўради.
«Сурхон» матбуот хизмати эса учрашув нима сабабдан Тошкентга кўчрилгани ҳақида маълумот берди. Унга кўра, «Навбаҳор» клуби Термизда меҳмонхона топиш билан боғлиқ муаммога дуч келаётгани, пандемия сабаб автотранспорт воситаларининг ҳаракати чеклангани ва«Сурхон»нинг уй стадионидаги ёритиш тизимидаги муаммолар ўйиннинг Тошкентга кўчирилишига сабаб бўлган.
Эслатиб ўтамиз, «Навбаҳор» ва «Сурхон» жамоалари ўртасидаги баҳс 21 июль, сешанба куни 19:00 да бошланади.
9-турдан сўнг «Навбаҳор» 17 очко билан 3-ўринда бормоқда. «Сурхон» (7) 11-поғонага жойлашган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)