АҚШ хорижлик талабаларни онлайн-таълим сабаб депортация қилиш тўғрисидаги режасидан воз кечди
Дональд Трамп администрацияси онлайн режимда ўқийдиган хорижлик талабалар янги ўқув йилидан бошлаб АҚШ ҳудудини тарк этишлари тўғрисидаги қарорини бекор қилди. Бу ҳақда Бостон округ судида АҚШ ҳукуматига қарши мамлакат университетлари томонидан киритилган даъво юзасидан ўтказилган эшитувлар вақтида эълон қилинди, деб хабар беради CNN.
Июль ойининг бошида АҚШ ҳукумати кузги семестрдан бошлаб масофавий даср ўтиш режими амалга татбиқ этилса, мамлакатга Ф-1 ва М-1 визаси билан келган талабалар мамлакатни тарк этиши ёки бошқа таълим муассасига ўқишини кўчириши лозимлиги тўғрисида қарор қабул қилган.
Бунга жавобан Гарвард университети ва Массачусетс технологиялар институти АҚШ президенти администрациясининг қарори юзасидан Бостон округ судига шикоят қилганди.
Манбаларнинг сўзларига кўра, Оқ уй тақиқ тўғрисидаги қарори ва унинг ижроси яхши ўйланмагани, шу сабабли мазкур масалани АҚШда таълим олаётган эмас, балки янги келадиган хорижлик талабаларга нисбатан қўллаш лозимлигини тан олган.
Эслатиб ўтамиз, март ойининг ўрталарида АҚШда COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилган эди. Апрель ойининг охирларида эса Трамп иммигрантларнинг АҚШга кириши икки ойга тўхтатилганини маълум қилган эди.
