Германиялик олимлар коронавирусдан тузалиб чиққан одам организмида пайдо бўладиган антитаналар миқдори вақт ўтиши билан камайишини аниқлади, деб хабар бермоқда «РБК» ZDF телеканалига таяниб. Уларнинг фикрича, бу одамларни коронавирусга қарши эмлашнинг узоқ муддатли самадорлигини шубҳа остига олиши мумкин.

Фото: «РИА Новости»

Қайд этилишича, Мюнхендаги Швабинг юқумли касалликлар клиникасида январь ойи охирларида даволанган беморларда қон таҳлили ўтказилганда, уларда антитаналар миқдори сезиларди даражада камайгани аниқланган.

«Фақат юқори хавсизликдаги лабораторияда ўтказилиши мумкин бўлган тест натижаларидан тўққиз нафар берморнинг тўрт нафарида антитаналар миқдори камайганининг гувоҳли бўлдик», — деган Швабинг юқумли касалликлар клиникаси бош шифокори Клеменс Вендтнер. Унинг қўшимча қилишича, ушбу тадқиқот натижалари одам коронавирус билан қайтадан касалланиши мумкинлигидан далолат беради, аммо бу вакцинациялаш кампаниясига қандай таъсир кўрсатиши ҳали тўлиқ ўрганилмаганини тан олди.

Guardian’нинг ёзишича, Лондон қироллик коллежи олимлари ҳам худди шундай хулосага келди. Улар касалликдан тузалгандан сўнг бир неча ой ичида коронавирусга антитаналар миқдори камайганини исботловчи тадқиқот натижаларини эълон қилган.

Тадқидотчилар 90 нафардан ортиқ беморлани кузатиб, коронавирусга антитаналарнинг максимал миқдори касаллик аломатлари аниқланганидан уч ҳафта ўтгач пайдо бўлади, деган хулосага келган. Шундан сўнг унинг миқдори тезлик билан камайиб боради.

Олимларнинг таъкидлашича, 60 фоиз кишилар касалликдан сўнг COVID-19’га кучли иммунитетга эга бўлган, бироқ орадан уч ой ўтиб уларнинг фақат 17 фоизигина касалликка қарши шундай иммунитетни сақлаб қолган. Қолганларида антитаналар миқдори 23 баравар камайган, айримларида эса бутунлай йўқолган.

Тадқидотнинг асосий муаллифи бўлмиш Кэти Дорснинг айтишича, антитананинг бундай хусусияти вакцинациялаш дастурига таъсир кўрсатиши мумкин. «Одамлар вирусдан юқори даражада ҳимояга муҳтож бўлиши ва вакцинанинг битта инъекцияси етарли бўлмаслиги мумкин», — дейди у.

Аввалроқ Ўзбекистон Санитария-эпидемиология назорати инспекцияси бош инспектори Нурмат Отабеков ва Соғлиқни сақлаш вазирлиги ҳузуридаги Коронавирусга қарши кураш штаби аъзоси, профессор Ҳабибулла Оқилов ҳам коронавирусга қайта чалиниш эҳтимоли ва антитаначалар таҳлили борасида ўз фикрларини баён қилганди.