ЎзА директори ўринбосари, ҳуқуқшунос Хушнудбек Худойбердиев «Улар» лойиҳасидаги интервьюсида 2014 йил Олий Мажлис Қонунчилик палатаси депутатлиги учун бўлиб ўтган сайловлар ҳақида сўзлаб берди.

Фото: «Улар» кўрсатувидан скриншот

Таъкидланишича, Хушнудбек Қашқадарё вилояти Чироқчи тумани 119-сайлов округидан ўз номзодини қўйган. Сайлов якунида эса катта эҳтимол билан ғалаба қозониши кутилаётган ҳуқуқшунос мағлуб бўлган. Шундан сўнг Хушнудбек ижтимоий тармоқдаги ўз саҳифаларини ўчириб ташлаган. Кейинчалик у Чироқчи тумани ҳокими билан ёқалашгани ҳақидаги миш-мишлар тарқалган.

Хушнудбек ўша сайлов жараёнини эслаб қуйидагиларни гапириб берди.

«Ўша пайтдаги сайлов тизимида нима бўлган бўлса, шу бўлганди. 4,8 фоиз овоз олган амалдаги депутатни ўтказишган. Мен ўзим неча фоиз овоз олганимни биламан. Ҳар ҳолда мени овозим 50 фоиздан кўп бўлган ўшанда… Ҳоким билан кўришганман, вилоят ҳокими ҳузурига бориб келганман. Ака-ука бўлиб қолайлик, сизга ҳам ёрдамимиз тегар, менинг айбим йўқ деган», — дейди Хушнудбек Худойбердиев.

Хушнудбек ўша вақтдаги тарқалган турли гап-сўзларни миш-миш эканини айтди.

«Хушнудни урибди, касалхонага тушиб қолибди деган, Хушнуд қочиб хорижга кетиб қолибди ёки Хушнуд жойини 50 миллионга сотибди деган миш-мишлар ‘болалаган’», — дейди ҳуқуқшунос.

Хушнудбек мазкур сайловларда ютиб чиқмаганидан хурсандлигини ҳам айтиб ўтган. Унинг фикрича, агар депутат бўлганида тили сабаб кўп муаммога учраши ва карьераси ҳамда оиласи учун бу хавфли бўлиши мумкин эди.