Ҳабибулла Оқилов: «Ҳозир коронавируснинг иккиланиш даври Тошкентда 2 ҳафтагача тушиб кетган»

Соғлиқни сақлаш вазирлиги ҳузуридаги коронавирусга қарши кураш штаби аъзоси, профессор Ҳабибулла Оқилов Ўзбекистонда қатъий карантин тартибларининг қайтарилиши сабабларини маълум қилди.

«Касалланиш сонининг иккига кўпайтирилиш даврини асосий кўрсаткич, деб биламиз. Республикамизнинг асосий ҳудудлари яшил бўлиб турган пайтда иккиланиш кўрсаткичи 10-11 ҳафтага етган бўлса, ҳозир Республикада иккиланиш даври ўрта ҳисобда 3 ҳафтадан сал ошади, Тошкентда 2 ҳафтагача тушиб кетган. Бунинг асосий сабаблари олдин бизда янги касалланиш ҳолатлари фақатгина асосан чет элдан қайтарилаётган ватандошларимиз ичидан чиққан бўлса, ҳозирги кунда тенг ярми аҳоли орасида аниқланмоқда», — дейди мутахассис.

Карантин чоралари юмшатила бошланганидан сўнг касалланиш сони кескин ортиши чоралар кучайтирилишининг яна бир сабаби сифатида қайд этилди. Бугунги кунда коронавирусга йўналтирилган шифохоналарнинг жами 5 мингдан ортиқ койка-ўринларида коронавирусга чалинган беморлар даволанмоқда. Айни рақам жуда катта эканлиги, зарарланганлар сонини қисқартириш ҳамда касалланиш занжирини ҳеч бўлмаганда бир ойга узиш ва тизимни қайта тиклаш ҳам қатъий карантин қайтишининг сабабларидан бири сифатида таъкидланди.Эслатиб ўтамиз, Президент Шавкат Мирзиёев 8 июль куни бўлиб ўтган видеоселекторда мамлакатдаги коронавирус билан боғлиқ вазиятга тўхталиб, жойларда белгиланган қоидаларга амал қилиш борасида сусткашликка йўл қўйилганини таъкидлаганди ҳамда 10 июлдан бошлаб карантин чекловлари кучайтирилиши муносабати билан вилоят раҳбарларига аҳолига мурожаат қилиш бўйича топшириқ берганди.