Футбол бўйича Coca-Cola Суперлига 9-турида «Пахтакор» 13 июль, душанба куни ОКМКни қабул қилди.
Фото: ПФЛ
Учрашув ҳар икки жамоанинг фаоллиги остида бошланди, вазиятлар яратишда «шерлар» бироз устунлик қилди. Бироқ биринчи бўлиб гол уриш олмалиқликларга насиб этди. 33-дақиқада Арсланмурод Аманов қанотдан узатилган тўпни боши билан Элдор Суюнов дарвозасига жойлаб қўйди.
Иккинчи бўлим дебютида Фаррух Сайфиев майдон марказида тўпни олдириб қўйди ва Мате Вацадзе дарвозабон билан бирга-бир вазиятга чиқиб кетди. Унинг узатмасидан кейин тўп Ҳожиакбар Алижоновнинг қўлига тегди ва ҳакам 11 метрлик нуқтани кўрсатди. Пенальтини Ёван Жокич аниқ бажариб, «кончилар»нинг иккинчи голини урди.
Иккинчи бўлим ярмига келиб Шота Арвеладзе шогирдлари вазиятни ўнглашга муваффақ бўлди. 72-дақиқада захирадан майдонга тушганига кўп бўлмаган Игор Сергеев ҳисобни қисқартирган бўлса, орадан икки дақиқа ўтиб Достон Ҳамдамов мувозанатни тиклади. Қолган вақтда ҳисоб ўзгармади.
Мазкур дурангдан кейин «Пахтакор» 22 очко билан пешқадамликни сақлаб қолди. Миржалол Қосимов жамоаси эса мағлубиятсиз сериясини давом эттирган ҳолда 21 очко билан иккинчи поғонада қолди.
Coca-Cola Суперлига
9-тур баҳслари
13 июль, душанба
«Пахтакор» — ОКМК 2:2
Голлар: 0:1 – 33 Аманов, 0:2 – 53, Жокич, 1:2 – 72 Сергеев, 2:2 – 74 Ҳамдамов.
«Пахтакор»: Элдор Суюнов, Ҳожиакбар Алижонов (Акром Комилов, 89), Одилжон Ҳамробеков, Сардор Собирхўжаев, Егор Кримец (Шерзод Аъзамов, 31), Анзур Исмоилов, Фарруҳ Сайфиев, Жалолиддин Машарипов, Драган Черан, Достонбек Ҳамдамов (Жавоҳир Сидиқов, 89), Эрен Дердийок (Игор Сергеев, 60).
ОКМК: Суҳроб Султонов, Мирғиёс Сулаймонов, Сардор Раҳмонов, Игор Зонич, Мурод Тошматов, Миржамол Қосимов, Ёван Жокич, Арслонмурод Аманов (Сайдулло Раҳматов, 80), Баҳром Абдурахимов (Шаҳзод Нурматов, 56), Ҳожимат Эркинов, Мате Вацадзе.
Огоҳлантириш: Машарипов (89).
