«Аталанта» А Сериянинг 32-туридан ўрин олган учрашувда «Ювентус» майдонига сафар қилиб, 2:2 ҳисобида дуранг ўйнади.
Учрашувнинг 16-дақиқасида «Аталанта» ҳужумчи Дуван Сапата «Ювентус» дарвозасини аниқ нишонга олди. Сапата учун бу Италия чемпионатининг жорий мавсумидаги 15-гол бўлди.
Шу тариқа «Аталанта»нинг бир йўла уч ўйинчиси А Сериянинг бир мавсумида 15 ва ундан кўпроқ гол уришга муваффақ бўлди. Сапатадан ташқари, ярим ҳимоячи Йосип Иличич (15 та гол) ва ҳужумчи Луис Муриел (17) 15 талик довонга етган.
Бергамоликлар 1951/52 йилги мавсумда «Ювентус» ҳужумчилари – Жамперо Бониперти, Эрмес Муччинелли ва Жон Ҳансен томонидан қайд этилган натижани такрорлади. Football Italia хабарига кўра, ўтган мавсумда худди шундай статистикани ПСЖ ҳужумчилари — Эдинсон Кавани, Неймар ва Килиан Мбаппе ҳам қайд этган.
32-турдан кейин «Аталанта» 67 очко билан мусобақа жадвалида 3-ўринни эгаллаб турибди, жамоа 2-поғонадаги «Лацио»дан 1 очкога ортда қолмоқда. «Ювентус» эса 76 очко билан якка пешқадам бўлиб турибди.
Мавзуга доир:
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)