Футбол бўйича Coca-Cola Суперлига 8-туридан ўрин олган «Насаф» — «Металлург» учрашувидан (1:0) сўнг икки жамоа бош мураббийлари ўз фикрлари билан ўртоқлашди.
Матбуот анжуманининг биринчи қисмида меҳмонлар устози Андрей Шипилов ўйин ҳақидаги фикрларини билдирди.
«Яхши ўйин бўлди. Бу шаҳарда, бу стадионда ўйнаш доим завқ бағишлайди. Охиригача сабр қила олмадик, «Насаф»ни ғалаба билан табриклайман. Лекин дуранг адолатли натижа бўларди деб ўйлайман. Улар ўз ўйинларини ўйнади, биз ўз вазифамизни бажардик. Тўртинчи бор сафарда ўйин ўтказдик, барибир оғир. «Насаф»дек яхши жамоага қарши ўйин ўтказдик», — дея Шипиловнинг сўзларини келтирмоқда «Championat.asia».
Шунингдек, «Насаф» бош мураббийи Рўзиқул Бердиев ҳам ўз фикрларини баён қилди.
«Ўйлайманки, футболчиларимиз барчани хурсанд қила олди. Чунки охирги ўйинларда натижа қониқарсиз кўриниш олаётганди. Ўйинга келадиган бўлсак, биз назорат уни қила олдик ва шижоат билан ҳаракат қилдик. «Металлург» жамоасига кам имконият бердик. Улар кўпроқ қарши ҳужумда ўйнашга ҳаракат қилди. Ҳимоячиларимиз рақиб ҳужумларини бартараф этишни уддасидан чиқди. Захирадан майдонга тушган ёш футболчиларимиз ўйинни кучайтирди. Бу қайсидир маънода ғалабада бош омил бўлди.
Албатта, «Металлург» биз учун ноқулай рақиб. Лекин, тан олиш керак бекободликлар тажрибали жамоа. Таркибига назар солиб, бунга ишонч ҳосил қилиш мумкин. Жамоада мураббийнинг имзоси кўриниб турибди. Юқори ўринлар учун курашишга имконияти бор жамоа. Шунга қарамай бугунги ўйин тўлиқ устунлигимизда ўтди. Улар қарши ҳужумда ҳам деярли имконият ярата олмади. Ўзингиз кўраётган бўлсангиз, бизга қарши кўп жамоалар ҳимоявий услубни танламоқда.
Ҳар бир учрашувларда руҳий жиҳатдан босим билан ўйнамаяпмиз. Буни ўзингиз ҳам кўрдингиз. Ўтган ўйинларни эсдан чиқаришга ҳаракат қиляпмиз. Агарда бизда руҳият билан боғлиқ муаммо бўлганида бугун охиригача кураша олмаган бўлардик, тажрибали жамоани енгиш осон бўлмасди», — дейди Бердиев.
Мазкур ўйиндан кейин «Насаф» очколарини 15 тага етказиб олган ҳолда 4-ўринга кўтарилди. «Металлург» (13) эса 6-поғонага тушиб кетди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!